#deputatlik_nazorati_Uchtepa #ekspert_guruhlari

O‘RIKZOR MAHALLASIDAGI 603-DMTT - QO‘SHIMCHA O‘RINLAR YARATISH ISHLARI QACHON BOSHLANADI?

📁 O‘rikzor mahallasida joylashgan 603-sonli davlat maktabgacha ta’lim tashkilotida navbatda turgan bolalar soni 512 nafarga yetgan. Mazkur muammoni hal etish maqsadida muassasani rekonstruksiya qilish va jihozlash orqali qo‘shimcha 120 ta o‘rin yaratish rejalashtirilgan. Xalq deputatlari Uchtepa tumani Kengashining 2026-yil 14-avgustdagi III-32-71-14-202-K/26-sonli qaroriga muvofiq, ushbu maqsadlar uchun 2026-yilning birinchi choragida bozor tushumlaridan tushgan mablag‘lar hisobidan 2 milliard so‘m ajratish belgilangan.

🇺🇿 Ushbu masalani joyiga chiqib o‘rganishda xalq deputatlari Uchtepa tumani Kengashining "14-O‘rikzor" saylov okrugi deputati Abdurashid Abdushukurov, Kengash kotibiyati mudiri A.Usmanov, ekspert guruhi a'zosi A.Giyasov hamda tegishli soha mutaxassislari ishtirok etdi. O‘rganish davomida oqova suv tizimi bilan bog‘liq muammolar mavjudligi, to‘rtta yangi guruh tashkil etish, ularni kommunikatsiya tarmoqlariga ulash va oqova suvlarni markazlashgan tizimga chiqarish zarurati aniqlandi. Ushbu masalalarni hal etish yuzasidan mas’ullarga tegishli topshiriqlar berildi.

⚠️ Biroq o‘rganish davomida qarorda belgilangan 2 milliard so‘m mablag‘ hisobidan rekonstruksiya va ta’mirlash ishlari hali boshlanmagani aniqlandi. Bu holat loyihaning ijrosi va ishlarni boshlash muddatlariga jiddiy e’tibor qaratishni talab etadi. Endilikda mas’ullar oldida ajratilgan mablag‘larni maqsadli o‘zlashtirish, mavjud muammolarni bartaraf etish hamda qo‘shimcha 120 ta o‘rinni belgilangan muddatlarda foydalanishga topshirish vazifasi turibdi. Zero, muhim ijtimoiy loyihalarning samarasi ajratilgan mablag‘lar hajmi bilan emas, aholi, eng avvalo, bolalar uchun yaratilgan real sharoitlar bilan baholanadi.