Xalq deputatlari Muzrabot tumani Kengashi deputatlari tomonidan aholi salomatligini muhofaza qilish, sifatli tibbiy xizmat ko‘rsatish hamda davlat tomonidan ajratilayotgan bepul dori-darmonlarning manzilli va shaffof taqsimlanishi ustidan deputatlik nazorati izchil olib borilmoqda.

Shu maqsadda Xalq deputatlari Muzrabot tumani Kengashi kotibiyati mudiri Dilmurod Sherboyev hamda tuman Kengashi kotibiyati bosh mutaxassisi B. Xoliqov birgalikda Xalq deputatlari Muzrabot tumani Kengashining 24-«Navbahor» saylov okrugidan saylangan deputat A. Suvanovning saylov okrugiga qarashli «Tong yulduzi» mahallasida joylashgan 49-son oilaviy poliklinikada o‘rganish tadbiri o‘tkazildi.

O‘rganish davomida tibbiyot muassasasining kundalik faoliyati, aholiga ko‘rsatilayotgan birlamchi tibbiy-sanitariya yordami sifati, bemorlar uchun yaratilgan shart-sharoitlar, shifokorlar qabuli hamda xizmat ko‘rsatish jarayonlari batafsil ko‘zdan kechirildi.

O‘rganish jarayonida tibbiyot xodimlarining bemorlar bilan muomala madaniyati, navbatlarni tashkil etish, murojaatlarga munosabat bildirish hamda xizmat ko‘rsatish sifati ham tahlil qilindi. Aniqlangan ayrim kamchiliklarni bartaraf etish, tibbiy xizmat samaradorligini oshirish va aholiga yanada qulay sharoit yaratish yuzasidan mas’ullarga tegishli tavsiya va takliflar bildirildi.