Xalq vakillari bo‘lgan deputatlar o‘zlari saylangan hududlarda saylovchilar bilan yuzma-yuz muloqot qilib, fuqarolar tomonidan ko‘tarilayotgan masalalarni o‘rganish va ularning yechimini ta’minlashda tashabbus ko‘rsatmoqda.Jumladan, Xalq deputatlari Parkent tumani Kengashiga 18-Buloqboshi saylov okrugidan saylangan deputat Karimshikov Sabriddin Azimovichga o‘zi saylangan “Bo‘rsiliq” MFY, A.Navoiy ko‘chasida istiqomat qiluvchi fuqarolar tomonidan hududdagi kanalizatsiya tizimi bilan bog‘liq muammo yuzasidan murojaat qilindi.Murojaatni joyiga chiqqan holda o‘rganish maqsadida deputat S.Karimshikov ko‘cha boshi Xamidulla Mirzaboyev bilan birgalikda “Buloqboshi” MFY, A.Navoiy shox ko‘chasidagi 80-uy oldida joylashgan oqova suv quvurlari kolodetsining holatini o‘rgandi.O‘rganish davomida hududdan yangi katta avtomobil yo‘li qurilishi natijasida soy bo‘yidan o‘tgan kanalizatsiya tarmog‘ining ayrim qismlari buzilgani, buning oqibatida mavjud kanalizatsiya tizimi ishlamayotgani aniqlandi. Mazkur muammoni bartaraf etish va kanalizatsiya tarmog‘ining faoliyatini qayta tiklash zarurligi qayd etildi.Aniqlangan muammo hududdagi mavjud masalalarni qayd etish daftariga kiritildi. Kanalizatsiya bilan bog‘liq masalani tegishli doimiy komissiya yig‘ilishida ko‘rib chiqish hamda uni bartaraf etish yuzasidan tegishli mas’ullarga deputatlik nazorati doirasida murojaat etish belgilandi.Shuningdek, ko‘cha boshi tomonidan ko‘chaning 80 metr qismini asfaltlashtirish masalasida ham murojaat bildirildi. Mazkur masala yuzasidan tegishli mutasaddilarga deputatlik so‘rovi bilan murojaat etish belgilandi. Bunday uchrashuvlar deputatlik nazoratini joylarda kuchaytirish, aholini qiynayotgan muammolarni bevosita o‘rganish, ularni mas’ul tashkilotlar bilan hamkorlikda bartaraf etish hamda fuqarolar manfaatlarini himoya qilishda muhim ahamiyat kasb etmoqda.