Davlatimiz rahbari Shavkat Mirziyoyev tashabbusi bilan Parkent tumanida hududlarni obodonlashtirish, ichki yo‘llarni yaxshilash va aholi uchun qulay shart-sharoitlar yaratishga qaratilgan bunyodkorlik ishlari izchil davom ettirilmoqda.Xalq deputatlari Parkent tuman Kengashiga 13-“Istiqbol” saylov okrugidan saylangan deputat Mahmudova Baxtinisa Zuxriddinovna bilan aholi o‘rtasida o‘tkazilgan uchrashuvlar davomida “Istiqbol” MFY hududidagi ichki yo‘llarni asfaltlashtirish masalasida fuqarolar tomonidan murojaatlar bildirilgan edi.Mazkur murojaatlar deputat tomonidan nazoratga olinib, aholi tomonidan ko‘tarilgan masalani amaliy hal etish yuzasidan tegishli ishlar olib borildi.Bugungi kunda “Istiqbol” MFY hududidagi “Bog‘bon”, “Barkamol avlod-1”, “Barkamol avlod-2”, “Barkamol avlod-3” va “Barkamol avlod-4” ko‘chalarining jami 2 kilometr qismida asfaltlashtirish ishlari amalga oshirilmoqda.Mazkur ishlarning borishi va sifatini o‘rganish maqsadida deputat Mahmudova Baxtinisa Zuxriddinovna tomonidan joyiga chiqib jamoatchilik nazorati o‘tkazildi.Unda “Istiqbol” MFY raisi M. Qoraboyev ham deputat bilan birgalikda ishtirok etib, asfaltlashtirish ishlarining borishi, sifati va belgilangan talablar asosida bajarilishini joyida o‘rgandi.Nazorat davomida yo‘l qurilish ishlarining borishi, bajarilayotgan ishlarning sifati hamda hudud aholisi uchun yaratilayotgan qulayliklar ko‘zdan kechirildi.Shuningdek, aholi bilan bevosita muloqot qilinib, ularning fikr va takliflari tinglandi. Fuqarolar o‘z murojaatlari asosida ichki yo‘llarning asfaltlashtirilayotganidan mamnun ekanliklarini bildirib, amalga oshirilayotgan bunyodkorlik ishlari uchun minnatdorlik bildirdilar.