Xalq deputatlari Qo‘qon shahar Kengashining “Ijtimoiy soha, yoshlar siyosati, madaniyat va sport masalalari bo‘yicha” doimiy komissiyasi a’zolari tomonidan shahardagi 7-son Bolalar musiqa va san’at maktabida milliy cholg‘u asboblari yo‘nalishida tahsil olayotgan o‘quvchilar uchun yaratilgan shart-sharoitlar yaqindan o‘rganildi.

O‘rganish davomida milliy cholg‘u asboblari bo‘yicha mashg‘ulotlar olib boriladigan o‘quv xonasining yetarli darajada jihozlangani, o‘quvchilar uchun zarur musiqa asboblari va mashg‘ulotlar uchun sharoitlar mavjudligi ko‘zdan kechirildi.

Shuningdek, mazkur yo‘nalishda faoliyat olib borayotgan o‘qituvchining kasbiy mahorati, amaliy tajribasi va o‘quvchilarga milliy cholg‘u asboblarini o‘rgatish borasidagi faoliyati bilan yaqindan tanishildi.

O‘rganish jarayonida o‘quvchilarning milliy musiqa san’atiga bo‘lgan qiziqishini oshirish, ijodiy qobiliyatlarini rivojlantirish hamda mashg‘ulotlarni yanada samarali tashkil etish masalalariga alohida e’tibor qaratildi.

Yakunda mavjud sharoitlarni yanada takomillashtirish va yosh iste’dodlarni qo‘llab-quvvatlash yuzasidan tegishli taklif va tavsiyalar bildirildi.

Xalq deputatlari Qo‘qon shahar Kengashi