Сырт ел инвесторлары менен бирге ислесиўдиң жаңа бағдарлары белгилеп алынды

18-июнь күни Ташкент қаласындағы Халықаралық коньгресс орайында Өзбекстан Республикасы Президенти Шавкат Мирзиёевтиң басшылығында Сырт ел инвесторлары кеңесиниң гезектеги жалпы мәжилиси болып өтти. Мәжилисте мәмлекет экономикасына тиккелей сырт ел инвестицияларын тартыў, бар жойбарларды жеделлестириў ҳәм жаңа бирге ислесиў бағдарларын белгилеў мәселелери додаланды.

Илажда соңғы жылларда Өзбекстанда инвестициялық орталықты жақсылаў бойынша әмелге асырылған реформалар, салық ҳәм бажыхана системасындағы жеңилликлер, сондай-ақ, жеке меншик секторды қоллап-қуўатлаўға қаратылған илажлардың нәтийжелери атап өтилди. Сырт елли инвесторлар мәмлекеттеги турақлы экономикалық өсиў, инфраструктуралық жойбарлардың кеңейиўи ҳәм ашық-айдынлық сиясатын унамлы баҳалады.

Мәжилисте енергетика, аўыл хожалығы, санлы экономика, банк-финанс ҳәм санаат тараўлары сырт ел капиталын тартыў ушын тийкарғы бағдарлар сыпатында көрсетип өтилди. Соның менен бирге, мәмлекетлик-жеке меншик шериклик механизмлерин буннан былай да кеңейтиў, инвестициялық жойбарларды әмелге асырыўда бюрократиялық тосқынлықларды қысқартыў бойынша усыныслар алға қойылды.

Президенттиң шығып сөйлеген сөзинде сырт ел инвесторлары ушын және де қолайлы ҳәм ашық-айдын орталық жаратыў мәмлекетлик сиясаттың стратегиялық бағдары екени атап өтилди. Сондай-ақ, инвесторлар менен турақлы қарым-қатнасты күшейтиў ҳәм олардың машқалаларын жедел шешиў ушын институционаллық механизмлер жетилистирилетуғыны атап өтилди.

Айтгүл ЖОЛЫМБЕТОВА,
Халық депутатлары Мойнақ районлық Кеңеси депутаты, ӨзХДП депутатлық топары ағзасы