O‘zbekiston Respublikasi Prezidentining PQ–406-son qarori hamda Oliy Majlis Senati Kengashining KQ–35-V-son qarori ijrosini ta’minlash, shuningdek, mahalliy Kengash deputati faoliyatining eng muhim yo‘nalishlari bo‘yicha belgilangan 24 ta tavsiya asosida hududlarda deputatlik o‘rganishlari izchil davom ettirilmoqda.

Navbatdagi deputatlik o‘rganishi Xalq deputatlari Marg‘ilon shahar Kengashining 14-Nurafshon saylov okrugi deputati S.Jurayeva hamda deputatga biriktirilgan Kengash kotibiyati bosh mutaxassisi Z.Yakubova ishtirokida Nurafshon mahallasida o‘tkazildi.

O‘rganish davomida hududdagi huquq-tartibot va profilaktika ishlarining tashkil etilishi, xususan, voyaga yetmaganlar o‘rtasida nazoratsizlik va huquqbuzarliklarning oldini olish borasida amalga oshirilayotgan ishlar deputatlik nazorati doirasida ko‘rib chiqildi.

Jumladan, mahallada faoliyat olib borayotgan deputatga biriktirilgan tashkilot shahar IIB profilaktika inspektori Orifjonov Xurshidbek O‘tkirbek o‘g‘lining xizmat faoliyati qonunchilik talablari asosida o‘rganildi. Bunda profilaktika inspektorining voyaga yetmaganlar bilan ishlash, ularning huquq va qonuniy manfaatlarini himoya qilish, nazoratsizlikning oldini olish hamda huquqbuzarlik sodir etilishiga olib keluvchi omillarni barvaqt aniqlash borasidagi faoliyatiga alohida e’tibor qaratildi.

Xususan, O‘zbekiston Respublikasining 2010-yil 29-sentabrdagi O‘RQ–263-son “Voyaga yetmaganlar o‘rtasida nazoratsizlik va huquqbuzarliklarning profilaktikasi to‘g‘risida”gi Qonunida belgilangan vazifalarning hududda amalda qanday ta’minlanayotgani tahlil qilindi.

Deputatlik o‘rganishining asosiy maqsadi — mavjud holatni shunchaki qayd etish emas, balki voyaga yetmaganlarning huquq va manfaatlarini himoya qilish, ular o‘rtasida huquqbuzarliklarning oldini olish hamda profilaktik ishlarning samaradorligini oshirishga qaratilgan chora-tadbirlarning amaliy ijrosini baholashdan iborat.

Bunday o‘rganishlar mahallalarda qonun hujjatlarida belgilangan talablarning hayotga tatbiq etilishini ta’minlash, aniqlangan muammolarni mas’ul tashkilotlar bilan hamkorlikda bartaraf etish va aholi, ayniqsa, yoshlar bilan ishlash tizimini yanada takomillashtirishda muhim ahamiyat kasb etadi.

Xalq deputatlari Marg‘ilon shahar Kengashi tomonidan olib borilayotgan deputatlik o‘rganishlari ana shu maqsadga — hududlarda qonun ustuvorligini ta’minlash, fuqarolar manfaatlarini himoya qilish va mavjud muammolarga amaliy yechim topishga xizmat qilmoqda.