Xalq deputatlari Marg‘ilon shahar Kengashining Agrar, suv xo‘jaligi va ekologiya masalalari bo‘yicha doimiy komissiyasining navbatdagi yig‘ilishi bo‘lib o‘tdi.

Yig‘ilishni doimiy komissiya raisi Z.Domilayev olib bordi. Unda Kengash kotibiyat mudiri A.Ermatov, ekspert-maslahat guruhi a’zolari Z.Yakubova, S.Toshpo‘latov, doimiy komissiya a’zolari hamda mas’ul tashkilotlar vakillari ishtirok etdi.

Kun tartibidagi asosiy masala — Ekologiya, atrof-muhitni muhofaza qilish va iqlim o‘zgarishi sohasidagi nazorat bo‘yicha Marg‘ilon shahar bo‘limining amalga oshirgan ishlari yuzasidan hisobotini eshitish bo‘ldi. Hisobotni bo‘lim boshlig‘i N. G‘ulomov taqdim etdi.

Ma’lumotlarga ko‘ra, shahardagi 50 ta mahallada chiqindilarni yig‘ish va olib chiqish xizmatlarini 3 ta xususiy sanitariya korxonasi amalga oshirmoqda. Shaharda 12 ta chiqindi yig‘ish maydonchasi va 134 ta konteyner tashkil etilgan.

Noqonuniy chiqindi tashlash holatlari bo‘yicha o‘tkazilgan reydlar davomida huquqbuzarliklar aniqlanib, jami 65 million 920 ming so‘m miqdorida ma’muriy jarimalar undirilgan.

Yig‘ilishda daraxt va butalarni muhofaza qilish masalasiga ham e’tibor qaratildi. Shaharda o‘tkazilgan xatlov natijasida 2 490 tup daraxt hisobga olingan. Hisobot davrida daraxtlarni noqonuniy kesish holatlari yuzasidan tegishli ma’muriy choralar ko‘rilib, 132 million so‘m miqdorida zarar hisoblangan.

Shuningdek, 2026-yil bahorgi mavsumida Marg‘ilon shahrida 96 ming 500 tup mevali va manzarali daraxt hamda buta ko‘chatlari ekilib, reja 100 foiz bajarilgani qayd etildi.

Muhokama davomida deputatlar ekologik nazoratni kuchaytirish, chiqindilarni noqonuniy tashlashning oldini olish hamda ekilgan daraxt va ko‘chatlarni asrash va parvarishlash bo‘yicha mas’ullarga tegishli tavsiyalar berdi.

Yig‘ilish yakunida ekologik barqarorlikni ta’minlash va atrof-muhit muhofazasiga qaratilgan ishlarni izchil davom ettirish bo‘yicha vazifalar belgilandi.