Mirobod tumanida "Yashil makon" loyihasi doirasida daraxt va buta ko‘chatlarini ekish, yashil maydonlarni ko‘paytirish kabi istiqbolli ishlar amalga oshirilmoqda. 

Xususan, bugun, Mirobod tumani hokimi Anvar Sayfutdinov, tuman prokurori v.b. Umid Abdullayev, tuman IIOFMB boshlig‘i O.Xadjayev, tuman davlat soliq inspeksiyasi boshlig‘i X.Inomov va Xalq deputatlari Mirobod tumani Kengashi deputatlari “Fayziobod” mahallasida mevali daraxt ko‘chatlarini ekdilar. 

“Yashil makon” – O‘zbekiston Respublikasi Prezidenti tashabbusi bilan 2021-yildan buyon amalga oshirilib kelayotgan umummilliy harakatdir. Loyiha doirasida ekologik vaziyatni yaxshilash maqsadida Toshkent “yashil belbog‘i” yaratilmoqda. 

Mirobod tumanida barpo etilayotgan yashil hududlar ham ushbu loyihaning uzviy bir qismidir. 

Tumanda joriy yilda 36647 dona daraxt ko‘chatlari ekilishi rejalashtirilgan. 

Safimizga qo‘shiling - tumanimizni yashil makonga aylantirib, o‘zimiz uchun, bolalar, farzandlar, kelajak avlodlar uchun hech bo‘lmaganda bir siqim yaxshilik, bir misqol toza havo, bir chimdim soya yarataylik – har birimiz hech bo‘lmaganda bittadan ko‘chat o‘tqazib, parvarishlaylik. 

Bu sizu bizning qo‘limizdan keladigan va bajarishimiz zarur, insoniy burch bo‘lgan ishdir.  

Ko‘chat o‘tqazib, yurtni obod qilishdek xayrli ishda chekkada turmang, aziz yurtdoshlar!  

Yangi O‘zbekiston – Yashil makonda birga yashaylik!