Xalq deputatlari Yangiobod tuman Kengashi deputati A. Kenjayev Shodlik mahallasida mahalla faoli, nuroniy oqsoqol Mavlonov Xudoyberdi bobo bilan uchrashib, mahallada obodonlashtirish ishlarining borishi hamda aholini kambag‘allikdan chiqarish yo‘nalishida amalga oshirilayotgan chora-tadbirlar holatini muhokama qildi.

Muloqot davomida hududni obod saqlash, ko‘cha va umumiy foydalanish joylarining tozaligiga e’tibor qaratish, aholi o‘rtasida obodonlashtirish ishlarida hamjihatlikni kuchaytirish masalalari yuzasidan fikr almashildi. Mahalla muhitini yaxshilash nafaqat hudud ko‘rkini oshirishi, balki fuqarolarda umumiy mulkka egalik hissini kuchaytirishi ham ta’kidlandi.

Uchrashuvda aholining ijtimoiy-iqtisodiy ahvolini yaxshilash, ehtiyojmand oilalarni manzilli qo‘llab-quvvatlash, ishsiz fuqarolarni bandlikka yo‘naltirish hamda xonadonlarning daromad manbalarini kengaytirish masalalariga alohida e’tibor qaratildi.

Kambag‘allikni qisqartirishda har bir oilaning imkoniyati va ehtiyojidan kelib chiqib ish olib borish, fuqarolarni kasb-hunarga o‘rgatish, tadbirkorlik tashabbuslarini qo‘llab-quvvatlash hamda mavjud dasturlar imkoniyatlaridan samarali foydalanish muhimligi qayd etildi.

Shuningdek, mahalla faollari va nuroniylarning hayotiy tajribasi, tavsiya va takliflari hududdagi muammolarni aniqlash hamda ularning yechimlarini belgilashda muhim ahamiyat kasb etishi ta’kidlandi.

Deputat A. Kenjayev mahalladagi mavjud masalalarni doimiy e’tiborda tutish, tegishli tashkilotlar va mahalla faollari bilan hamkorlikda ish olib borish, aholini kambag‘allikdan chiqarish hamda hudud obodonligini ta’minlashga qaratilgan chora-tadbirlar samaradorligini oshirish muhimligini qayd etdi.

Asosiy maqsad — Shodlik mahallasida yashash sharoitlarini yaxshilash, aholining daromadlarini oshirishga ko‘maklashish va har bir xonadon farovonligiga xizmat qiladigan amaliy ishlarni izchil davom ettirishdan iborat.