Xalq deputatlari Marg‘ilon shahar Kengashi deputati B.Obidov tomonidan 8-Ma’orif saylov okrugidagi Ma’orif mahallasida ijtimoiy reyestrga kiritilgan oilalarning yashash sharoiti, bandligi va daromad manbalari manzilli o‘rganildi.

O‘rganishdan ko‘zlangan asosiy maqsad — barqaror ish o‘rinlarini yaratish, mehnatga layoqatli fuqarolar bandligini ta’minlash, oilalarning doimiy daromad manbalarini shakllantirish hamda kambag‘allikni qisqartirish borasida amalga oshirilayotgan ishlarning amaliy natijadorligini baholashdan iborat bo‘ldi.

Deputat va mahalla raisi ishtirokida ijtimoiy reyestrda qayd etilgan kambag‘al hamda kambag‘allik chegarasidagi oilalarning holati xonadonbay o‘rganilib, ularni qiynayotgan muammolar, mavjud imkoniyatlar va ehtiyojlar tahlil qilindi.

O‘rganishlar davomida oilalarni faqat ijtimoiy yordam bilan qo‘llab-quvvatlash emas, balki ularning daromad topish imkoniyatlarini kengaytirish, mehnatga layoqatli fuqarolarni doimiy ish bilan ta’minlash, kasb-hunarga o‘qitish va tadbirkorlik faoliyatiga jalb etish masalalariga alohida e’tibor qaratildi.

Aniqlangan muammolarni bartaraf etish, oilalarga ko‘rsatilayotgan ijtimoiy xizmatlarning manzilliligini ta’minlash va ularni kambag‘allikdan chiqarish bo‘yicha mas’ullar oldiga tegishli vazifalar qo‘yildi.

Deputatlik nazorati doirasida olib borilayotgan bunday manzilli o‘rganishlar oilalarning real ehtiyojlarini aniqlash, mavjud muammolarni joyida hal etish hamda fuqarolarning barqaror daromad manbalarini shakllantirishga qaratilgan chora-tadbirlar ijrosini ta’minlashga xizmat qiladi.