TASHABBUSLI BUDJET: III CHORAK YAKUNLARI KO‘RIB CHIQILDI

🏛 Xalq deputatlari Pastdarg‘om tumani Kengashining 2026-yil 19-oktabrdagi VII-35-129-7-101-K/26-son qarori bilan 2026-yil III chorak davomida jamoatchilik fikri asosida shakllantirilgan tadbirlarni moliyalashtirishga yo‘naltirilgan mablag‘lar hisoboti ko‘rib chiqildi.
📌 Sessiyada tuman Iqtisodiyot va moliya bo‘limi boshlig‘i o‘rinbosari U. Maxmanazarovning hisoboti qoniqarli deb topilib, ma’lumot uchun qabul qilindi.
💸
2026-yil 1-oktabr holatiga ko‘ra:
🛣 33 ta ichki yo‘l loyihasi doirasida jami 78,5 km yo‘lni ta’mirlash uchun 52 mlrd 364 mln so‘m mablag‘ sarflangani qayd etilgan.
🎓 10 ta ijtimoiy infratuzilma loyihasi doirasida 5 ta umumta’lim maktabi, 1 ta maktabgacha ta’lim tashkiloti, 1 ta sport maktabi, 1 ta sog‘liqni saqlash muassasasi, 1 ta kasb-hunar maktabi hamda elektr ta’minoti sohasidagi qurilish ishlari moliyalashtirilgan. Ushbu yo‘nalish bo‘yicha 15 mlrd 26 mln so‘m mablag‘ sarflangan.
📈 Hisobotda tashabbusli budjetlashtirish doirasida shakllangan mablag‘lar, g‘olib deb topilgan loyihalarni moliyalashtirish, bajarilgan ishlar uchun to‘lovlar va qolgan mablag‘lar to‘g‘risidagi ma’lumotlar ham keltirilgan.
🤩 Qaror bilan iqtisod qilingan mablag‘larni belgilangan tartibda jamg‘armaga qaytarish, tashabbusli budjetlashtirish natijalarini har chorak yakunida “Ochiq budjet” portaliga joylashtirib borish hamda loyihalar ijrosi haqidagi ma’lumotlarni tumanning rasmiy veb-saytlarida yoritish vazifalari belgilandi.
🤝 Tashabbusli budjet fuqarolarning hududlarni rivojlantirishdagi ishtirokini kengaytirish, aholi tomonidan ilgari surilgan loyihalarni qo‘llab-quvvatlash va budjet mablag‘larining ochiqligini ta’minlashga xizmat qiladi.