ONA TILI — MILLIY O‘ZLIK VA MA’NAVIY MEROS TIMSOLI

🏛 Til — millatning tarixi, ma’naviyati va kelajagini birlashtiruvchi bebaho boylik.

🇺🇿 Til millatni millat, xalqni xalq sifatida namoyon etadigan, uning tarixi, tafakkuri, ma’naviyati va milliy o‘zligini o‘zida mujassam etgan bebaho boylikdir. Inson dunyoga kelib, ilk bor onasining allasini eshitgan lahzadan boshlab til orqali olamni anglaydi, ezgulik va yovuzlikni farqlashni, o‘zligini tanishni o‘rganadi.

Xalq esa asrlar davomida to‘plagan hayotiy tajribasi, orzu-intilishlari, urf-odat va an’analarini til vositasida avloddan avlodga yetkazadi. Shu ma’noda, til — millatning kechmishi, buguni va kelajagini bir-biriga bog‘lab turuvchi ma’naviy ko‘prikdir.

📜 O‘zbek tili — milliy davlatchiligimiz va ma’naviy merosimizning muhim timsoli.

1989-yil 21-oktabrda o‘zbek tiliga davlat tili maqomi berilishi xalqimiz hayotidagi tarixiy voqea bo‘ldi. Ushbu maqom milliy o‘zlikni anglash, ona tilimizning jamiyat hayotidagi o‘rnini mustahkamlash va uni rivojlantirish yo‘lida muhim qadam bo‘ldi.

O‘zbekiston Respublikasi Konstitutsiyasining 4-moddasida O‘zbekiston Respublikasining davlat tili o‘zbek tili ekanligi belgilangan. Shuningdek, davlat mamlakat hududida istiqomat qiluvchi barcha millat va elatlarning tillari, urf-odatlari va an’analariga hurmat bilan munosabatda bo‘lishni ta’minlaydi.

📚 Ona tiliga hurmat — Vatanga hurmat!

Davlat tilining mavqeyini mustahkamlash faqat davlat tashkilotlarining emas, balki har bir fuqaroning ham mas’uliyatidir. Ona tilimizda to‘g‘ri va ravon so‘zlashish, savodli yozish, adabiy til me’yorlariga rioya qilish hamda yosh avlodda tilga hurmat tuyg‘usini shakllantirish barchamizning muhim vazifamizdir.

Ayniqsa, ta’lim muassasalari, ommaviy axborot vositalari, ijtimoiy tarmoqlar va kundalik muloqotda o‘zbek tilining imkoniyatlaridan to‘g‘ri foydalanish uning nufuzini yanada oshirishga xizmat qiladi.

🌿 Til yashasa — millat yashaydi!

Ona tilimizni asrash, uning boyligini o‘rganish, sofligini saqlash va kelajak avlodlarga bezavol yetkazish — milliy qadriyatlarimizga sadoqat ifodasidir. Zero, o‘z tilini qadrlagan xalq o‘z tarixini, madaniyatini va milliy o‘zligini ham qadrlaydi.

🇺🇿 O‘zbek tilini e’zozlash, uning nufuzini yuksaltirish va kundalik hayotimizda unga hurmat bilan munosabatda bo‘lish har birimizning fuqarolik burchimizdir.

✍️ Baxriddin Nurmatov - Xalq deputatlari Olmazor tumani Kengashi deputati

👇 Bizni ijtimoiy tarmoqlarda kuzatib boring!