Xususan, Zuhro MFY fuqarolari hamda 36-maktabgacha ta’lim muassasasi rahbari tomonidan kelib tushgan murojaatda hududda joylashgan chiqindi yig‘ish uchun mo‘ljallangan maxsus joyda chiqindilarni tartibsiz tashlab ketishlar natijasida noxush hidlar taralayotgani bildirilgan.

Mazkur murojaat asosida hududda atroflicha o‘rganish ishlari olib borildi. Unda Kengash kotibiyati mudiri A.Ermatov, Agrar, suv xo‘jaligi va ekologiya masalalari bo‘yicha doimiy komissiya raisi o‘rinbosari M.Abdurahmonova, mahalla raisi, sanitariya-epidemiologiya osoyishtaligi va jamoat salomatligi bo‘limi mutaxassislari, shahar ekologiya inspektorlari hamda BSK rahbarlari ishtirok etdilar.

O‘rganish jarayonida chiqindi yig‘ish maydonchasining holati ko‘zdan kechirilib,tanqidiy-tahliliy ruhda muhokama qilindi. 

Deputat M.Abdurahmonova ekologik madaniyatni oshirish bugungi kunning dolzarb vazifalaridan biri ekanini alohida ta’kidladi. U aholining atrof-muhitga nisbatan mas’uliyatini kuchaytirish, chiqindilarni to‘g‘ri saralash va belgilangan joylarga tashlash bo‘yicha targ‘ibot ishlarini kuchaytirish zarurligini bildirdi.

Shuningdek, BSK mas’ullariga chiqindilarni yig‘ish va olib chiqish tizimini takomillashtirish, zamonaviy va samarali yondashuvlarni joriy etish, aholiga qulaylik yaratish bo‘yicha aniq topshiriqlar berildi.

Ta’kidlanganidek, bu kabi muammolarni o‘z vaqtida aniqlash va bartaraf etish nafaqat hudud sanitariya holatini yaxshilash, balki aholi salomatligini muhofaza qilishda ham muhim ahamiyat kasb etadi.

Mazkur yo‘nalishdagi ishlar deputatlar nazoratida bo‘lib, monitoring ishlari davom ettiriladi.