SOG‘LOM JAMIYAT — BARQAROR TARAQQIYOT GAROVI

Xalq deputatlari Navoiy shahar Kengashi deputati Irgasheva Nilufar Uralovna tashabbusi bilan joriy yilning 9–10-fevral kunlari Navoiy shahar Kimyogar mahallasida fuqarolar uchun tibbiy ko‘rik tashkil etildi.

Mazkur tadbir aholi salomatligini mustahkamlash, kasalliklarni erta aniqlash va fuqarolarga malakali tibbiy maslahatlar berish maqsadida o‘tkazildi. Tibbiy ko‘rik jarayonida mahallada istiqomat qiluvchi turli yoshdagi fuqarolar shifokorlar tomonidan bepul tekshiruvdan o‘tkazilib, zarur tavsiya va maslahatlar oldilar.

Tadbirga jalb etilgan malakali tibbiyot xodimlari tomonidan qon bosimi, qand miqdori, yurak-qon tomir tizimi holati hamda boshqa yo‘nalishlar bo‘yicha ko‘riklar amalga oshirildi. Aniqlangan holatlar yuzasidan fuqarolarga davolanish va sog‘lom turmush tarzini olib borish bo‘yicha tushuntirishlar berildi.

Nilufar Irgasheva o‘z chiqishida aholi salomatligi har qanday jamiyat taraqqiyotining asosi ekanini ta’kidlab, bunday profilaktik tadbirlar kelgusida ham muntazam ravishda tashkil etilishini qayd etdi. Shuningdek, fuqarolar bilan ochiq muloqot o‘tkazilib, ularni qiynayotgan masalalar tinglandi.

Kimyogar mahallasi aholisi mazkur tibbiy ko‘rikni yuqori baholab, deputat tashabbusi uchun minnatdorlik bildirdi. Bunday amaliy ishlar aholi va deputat o‘rtasidagi hamkorlikni yanada mustahkamlab, xalq manfaatlariga xizmat qilayotgani bilan ahamiyatlidir.