Tashrif davomida deputat Dilbar Normurodova bilan bir qatorda, tadbirda ishtirok etgan mas’ullar ham Amonov Muhiddin Ziyodullayevich xotirasini yod etdilar. Muhididin Ziyodullayevich – o‘zining Vatani sarhadlari tinchligi yo‘lida cheksiz jasorat ko‘rsatib, jonini fido qilgan qahramonimizdir. Tadbirda uning hayoti va xizmat yo‘lidagi fidoyiligi, o‘z Vatani oldidagi cheksiz sadoqati alohida ta’kidlandi.

Maktab o‘quvchilari va jamoatchilik vakillari ishtirokida bo‘lib o‘tgan ushbu ma’naviy-ma’rifiy tadbirda, Muhididin Ziyodullayevichning jasorati avlodlarimiz uchun mardlik va vatanparvarlikning namunasi ekani qayd etildi. Uning yorqin xotirasi har bir yurtdoshimiz, xususan, kelajak egalari bo‘lgan yoshlar qalbiga hamisha muhrlanishi zarurligi ta’kidlandi.

Deputat Dilbar Normurodova o‘z chiqishida, qahramonimizning hayoti va jasorati yoshlarga vatanparvarlik, o‘z jonini ham vatan himoyasiga tikishdek oliy fazilatlarni o‘rgatishda muhim o‘rin tutishini qayd etdi. Bunday xotira tadbirlari yosh avlodni milliy qadriyatlarimizga hurmat ruhida tarbiyalash, ularda Vatanga muhabbat va mas'uliyat tuyg‘usini mustahkamlashga xizmat qiladi.

Tadbir ishtirokchilari xotira va hurmat bajo keltirish barobarida, Vatan himoyachilarining jasorati hech qachon unutilmasligini va ularning xotirasi qalblarda mangu saqlanishini ta’kidladilar.