O‘zbekiston Respublikasi Prezidentining 2026-yil 16-fevraldagi PQ–62-sonli qaroriga asosan tuman hududidagi Yangichek MFY Vissol ko‘chasida 25 ta savdo va servis shoxobchasini tashkil etish orqali xizmat ko‘rsatish sohasini rivojlantirish hamda qo‘shimcha ish o‘rinlarini yaratish belgilab berilgan. Mazkur qaror ijrosi doirasida amalga oshirilayotgan ishlar tuman Kengashi raisi Sh. Xaytahhunov, kotibiyat mudiri I. Jo‘raev, “Mahalliy budjet, tadbirkorlikni rivojlantirish va iqtisodiy islohotlar masalalari bo‘yicha doimiy komissiya” raisi E. Qurbonov hamda tuman hokimi o‘rinbosari A. Axmedov tomonidan joyiga chiqib o‘rganildi. O‘rganishlar davomida hududda zamonaviy arxitektura talablariga javob bermaydigan noqonuniy qurilmalarni bartaraf etish, shuningdek, yangi zamonaviy bino va inshootlar qurish ishlari olib borilayotgani aniqlandi. Shu bilan birga, hududdagi tadbirkorlar, aholi vakillari va quruvchilar bilan mamlakatimizda olib borilayotgan keng qamrovli islohotlar hamda bunyodkorlik ishlari insonlarning zamon bilan hamnafas, farovon va baxtli hayot kechirishiga xizmat qilayotgani yuzasidan suhbatlar o‘tkazildi. Davra suhbatida ishtirok etganlar yurtimizda, xususan tumanimizda amalga oshirilayotgan xalqchil siyosat va bunyodkorlik ishlaridan mamnun ekanliklarini bildirdilar. Ushbu sa’y-harakatlar hududda tadbirkorlik muhitini yaxshilash, yangi ish
o‘rinlarini yaratish hamda aholiga qulay xizmat ko‘rsatish imkoniyatlarini kengaytirishga xizmat qiladi.