Халқ депутатлари Янгиқўрғон туман Кенгашининг навбатдаги сессиясида Янгиқўрғон туман прокурорининг 2026 йилнинг биринчи чорагида ҳудудда қонун устуворлигини таъминлаш, ҳуқуқбузарлик ва жиноятчиликнинг олдини олиш борасида амалга оширилган ишлар юзасидан ахбороти эшитилди.

Ахборотда туман прокуратураси томонидан қонунлар, Президент фармон ва қарорлари ҳамда ижтимоий-иқтисодий ривожланишга доир топшириқлар ижросини таъминлашга алоҳида эътибор қаратилгани таъкидланди.

Жорий йилнинг 3 ойида туманда хавфсиз муҳитни шакллантириш, жиноятчилик сабабларини “маҳаллабай” ва “соҳабай” таҳлил қилиш, криминоген вазияти оғир маҳаллаларда профилактик тадбирларни кучайтириш бўйича қатор ишлар амалга оширилган.

Хусусан, тумандаги 68 та маҳалла бўйича чораклик манзилли “йўл хариталари” ишлаб чиқилиб, криминоген вазияти оғир 5 та маҳаллага масъул раҳбарлар бириктирилган. Маҳаллаларда жами 32 та кузатув камераси, 40 та домофон, 7 дан ортиқ ташвиш тугмалари ўрнатилган, 15 та “намунавий хавфсиз кўча” ва 10 та “намунавий хавфсиз уй” ташкил этилган.

Кузатув камералари ёрдамида қидирувда бўлган 3 нафар, жазодан бўйин товлаб келаётган 2 нафар шахс, шунингдек, олиб қочилган 2 та транспорт воситаси аниқланган. Бедарак йўқолган 4 нафар шахс топилиб, 8 та жиноят “иссиқ изи”дан фош этилган.

Шунингдек, ахборотда кибержиноятчилик, фирибгарлик, ўғрилик, оилавий-маиший ҳуқуқбузарликлар, ёшлар ўртасида жиноятчиликнинг олдини олиш, ишсизларни банд қилиш ҳамда муқаддам судланган шахсларни ижтимоий қўллаб-қувватлаш масалаларига ҳам алоҳида тўхталиб ўтилди.

Депутатлар томонидан туманда ҳуқуқбузарликларнинг барвақт олдини олиш, маҳаллаларда хавфсиз муҳитни мустаҳкамлаш, аҳоли ўртасида ҳуқуқий тарғибот ишларини янада кучайтириш юзасидан таклиф ва тавсиялар билдирилди.