ДЕПУТАТЛАР ИШТИРОКИДА «ТОЗА ҲАВО ОЙЛИГИ» ДОИРАСИДА НАЗОРАТ ТАДБИРИ ЎТКАЗИЛДИ
📅 10 августдан 10 сентябрга қадар
Халқ депутатлари Янгиқўрғон тумани Кенгашидаги Ўзбекистон Экологик партияси депутатлик гуруҳи аъзолари ташаббуси ва бевосита иштирокида «Тоза ҳаво ойлиги»нинг иккинчи босқичи доирасида экологик назорат тадбири ўтказилди.
Депутатлар Экология полицияси ҳамда ЙҲХБ давлат инспекторлари билан ҳамкорликда туман марказидаги «Ибрат» маҳалласи, Навкент кўчасида ҳаракатланаётган дизель, газ ва бензин ёқилғисида ишловчи автотранспорт воситаларининг экологик ҳолатини ўргандилар.
Назорат давомида депутатлар махсус лаборатория ускуналари орқали автотранспорт воситаларидан атмосферага чиқарилаётган зарарли газлар миқдорини ўлчаш жараёнларида иштирок этдилар. Аниқланган камчилик ва техник носозликларни бартараф этиш юзасидан ҳайдовчиларга тегишли тавсия ва тушунтиришлар берилди.
Шунингдек, депутатлар томонидан атроф-муҳитни муҳофаза қилиш, атмосфера ҳавоси мусаффолигини таъминлаш ва экологик маданиятни юксалтириш зарурлиги алоҳида таъкидланди. Автотранспорт воситаларига эко-стикерлар ўрнатиш тартиби юзасидан ҳам тарғибот-тушунтириш ишлари олиб борилди.
Мазкур тадбир депутатлик ва жамоатчилик назоратини кучайтириш, атмосфера ҳавосига чиқарилаётган зарарли ташламаларни камайтириш ҳамда аҳоли учун соғлом экологик муҳитни таъминлашга хизмат қилади.
🌿 Тоза ҳаво — соғлом ҳаёт ва мусаффо келажак гарови!