Xalq deputatlari Qo‘qon shahar Kengashi deputati F.Qaxxarova tomonidan saylovchilar bilan o‘tkazilgan uchrashuv davomida bildirilgan murojaat asosida navbatdagi deputatlik so‘rovi yuborildi.

Uchrashuv davomida Qo‘qon shahar “Shaldiramoq” mahalla fuqarolar yig‘ini aholisi tomonidan “Naymancha” ko‘chasi bilan bog‘liq muammo ko‘tarildi.

Fuqarolarning murojaatida mazkur ko‘cha uzoq yillardan buyon asfaltlashtirilmaganligi, ayniqsa kuz-qish mavsumlarida yo‘lning noqulay holati aholiga qiyinchilik tug‘dirayotgani hamda bu holat fuqarolarning haqli e’tirozlariga sabab bo‘layotgani bildirildi.

Aholi murojaatini inobatga olgan holda, deputat F.Qaxxarova tomonidan Qo‘qon shahar “Obodonlashtirish” boshqarmasi boshlig‘i nomiga deputatlik so‘rovi yuborildi.

Deputatlik so‘rovida “Shaldiramoq” MFY aholisi tomonidan ko‘tarilgan “Naymancha” ko‘chasini asfaltlashtirish masalasi yuzasidan qanday chora-tadbirlar ko‘rilishi, shuningdek, mazkur ko‘chani qachon asfaltlashtirish rejalashtirilgani haqida asoslantirilgan ma’lumot taqdim etish so‘ralgan.

Mazkur masala deputat nazoratiga olingan bo‘lib, deputatlik so‘roviga qonunchilikda belgilangan tartibda javob taqdim etiladi hamda murojaat yuzasidan amalga oshiriladigan ishlar va natijalar haqida qo‘shimcha ma’lumotlar berib boriladi.

Xalq deputatlari Qo‘qon shahar Kengashi