Xalq deputatlari Qo‘shko‘pir tuman Kengashi deputati Manzura Artiqova rahbarligida
Ijtimoiy soha, yoshlar siyosati, madaniyat va sport masalalari bo‘yicha doimiy
komissiya tomonidan tuman mahallalaridagi xotin-qizlar faollari ishtirokida
ishchi guruh tuzilib, “Ayollar daftari”ning 7-bosqichiga kiritilgan
xotin-qizlarning muammolarini hal etish yuzasidan amalga oshirilayotgan ishlar
o‘rganildi.

O‘rganish davomida 2026-yilning 6 oyi mobaynida “Ayollar daftari”ga kiritilgan
xotin-qizlarning individual dasturlarida belgilangan chora-tadbirlarning
ijrosi, ularning muammolarini manzilli hal etish borasida amalga oshirilgan
ishlar hamda erishilgan natijalarga alohida e’tibor qaratildi.

Jumladan, xotin-qizlarni ish bilan ta’minlash, kasb-hunarga o‘qitish, tadbirkorlik
faoliyatini yo‘lga qo‘yish va daromad manbalarini yaratish, shuningdek,
ijtimoiy va huquqiy ko‘mak ko‘rsatish borasidagi ishlarning samaradorligi
tahlil qilindi. Muammolarni shunchaki ro‘yxatga olish bilan cheklanib
qolmasdan, ularni amaliy va manzilli hal etish zarurligi ta’kidlandi.