O‘zbekiston Respublikasining 2021-yil 20-aprelda qabul qilingan O‘RQ-682-sonli “Normativ-huquqiy hujjatlar to‘g‘risida”gi Qonuni normativ-huquqiy hujjatlarni ishlab chiqish, qabul qilish, davlat ro‘yxatidan o‘tkazish, rasmiy e’lon qilish hamda ularning ijrosini ta’minlash sohasidagi munosabatlarni tartibga soluvchi asosiy huquqiy hujjat hisoblanadi.

Mazkur Qonun huquqiy tizimda qonuniylik, ochiqlik, shaffoflik va yagona huquqiy tartibni ta’minlashga xizmat qiladi. Shuningdek, normativ-huquqiy hujjatlarning sifatini oshirish, ularning amaldagi qonunchilikka muvofiqligini ta’minlash hamda davlat organlari faoliyatida huquqiy asoslarni mustahkamlashga qaratilgan.

Qonunga muvofiq fuqarolar normativ-huquqiy hujjatlar bilan tanishish, ularning rasmiy e’lon qilinishini talab qilish, hujjatlar mazmuni bo‘yicha aniq va ishonchli ma’lumot olish hamda qonunlar ijrosi ustidan jamoatchilik nazoratini amalga oshirish huquqiga ega.

Davlat organlarining asosiy vazifalari esa normativ-huquqiy hujjatlarni qonunga muvofiq qabul qilish, ularni davlat ro‘yxatidan o‘tkazish, rasmiy e’lon qilish, ijrosini monitoring qilish hamda huquqiy tizimning yagona va izchil faoliyat yuritishini ta’minlashdan iborat.

Ushbu Qonunning amaliy ijrosi mamlakatimizda demokratik islohotlarni izchil davom ettirish, fuqarolarning huquq va qonuniy manfaatlarini ishonchli himoya qilish hamda zamonaviy, ochiq va shaffof davlat boshqaruvi tizimini rivojlantirishga xizmat qiladi.

Xalq deputatlari Qo‘qon shahar Kengashi