#Tajriba_almashinuvi #poytaxtdeputatlari #deputatlik_faoliyati

❗️ Buxoroda mahalliy Kengashlar hamkorligiga bag‘ishlangan uchrashuvlar davom etmoqda

🏛 Oliy Majlisi Senati tashabbusi bilan tashkil etilgan tajriba almashuv safari doirasida Xalq deputatlari Toshkent shahar Kengashi hamda tuman Kengashlari deputatlaridan iborat delegatsiyaning Buxoro viloyatiga tashrifi mazmunli uchrashuvlar va amaliy tadbirlar bilan davom etmoqda.

📍 Dastlab delegatsiya a’zolari xalq deputatlari Kogon shahar Kengashi faoliyati bilan yaqindan tanishib, deputatlik faoliyatini tashkil etish, aholi murojaatlari bilan ishlash, doimiy komissiyalar faoliyati hamda hududlarni ijtimoiy-iqtisodiy rivojlantirish bo‘yicha amalga oshirilayotgan ishlar yuzasidan batafsil ma’lumotlarga ega bo‘ldilar.

💬 Shuningdek, Kogon shahar Kengashi deputati Sh. Isamutdinov hamda Kengash kotibiyati mutaxassislari I. Ikromov va Z. Temirovalar tomonidan hududda faoliyat yuritayotgan tadbirkorlar bilan o‘tkazilgan ochiq muloqot jarayonlari taqdim etildi. Unda tadbirkorlik subyektlarining murojaatlari, mavjud muammolarni bartaraf etish mexanizmlari, yangi ish o‘rinlarini yaratish va hudud iqtisodiyotini rivojlantirish borasidagi amaliy yondashuvlar haqida fikr almashildi.

📊 Safar davomida delegatsiya Buxoro viloyati hokimligi huzuridagi zamonaviy Boshqaruv markazi (Situatsion markaz) faoliyati bilan ham tanishdi. Mehmonlarga markazda hududlarni ijtimoiy-iqtisodiy rivojlantirish ko‘rsatkichlarini onlayn monitoring qilish, aholi murojaatlarini tahlil etish va nazorat qilish, shuningdek, tezkor boshqaruv qarorlarini qabul qilishda qo‘llanilayotgan raqamli texnologiyalar va innovatsion yechimlar haqida taqdimot o‘tkazildi.

🗣 Shundan so‘ng Buxoro viloyati hokimligida davra suhbati tashkil etilib, unda mahalliy Kengashlar vakolatlari, deputatlik nazorati samaradorligini oshirish, hududlarda amalga oshirilayotgan islohotlar ijrosini ta’minlash hamda davlat organlari va deputatlik korpusi o‘rtasidagi hamkorlikni mustahkamlash masalalari muhokama qilindi.

✨ Ochiq va samimiy muloqot ruhida o‘tgan uchrashuvlarda mahalliy davlat hokimiyati organlari faoliyatini takomillashtirish, raqamlashtirish jarayonlarini kengaytirish, aholi bilan ishlashning zamonaviy mexanizmlarini joriy etish hamda ilg‘or tajribalarni hududlar kesimida ommalashtirish yuzasidan qator taklif va mulohazalar bildirildi.

💡 Tajriba almashuv safari davomida erishilayotgan natijalar mahalliy Kengashlar o‘rtasidagi hamkorlikni yanada mustahkamlash, deputatlik faoliyati samaradorligini oshirish hamda zamonaviy boshqaruv tajribalarini amaliyotga keng joriy etishga xizmat qilmoqda.

📱 Telegram 📱 Instagram 📱 Facebook 📱 YouTube 🔎 E-kengash