Ózbekstan Respublikası Oliy Majlis Nızamshılıq Palatası deputatı N.Rashidova, Demokratiyalıq processlerdi analizlew orayı Qaraqalpaqstan aymaqlıq bólinbesi bas qánigesi J.Urazımbetov, Qaraqalpaqstan Respublikası tariyxı hám mádeniyatı mámleketlik muzeyi direktorı A.Yusupova, rayon hákiminiń orınbasarı A.Xojageldieva, Xalıq deputatları rayonlıq Keńesi Sekretariatı baslıǵı A.Ibragimov hámde 12-“Aspantay” okruginen saylanǵan deputat G.Jumanazarovalar qatnasıwında awır kategoriyaǵa kiritilgen “Aspantay APJ”da boldı.
Ózbekstan Respublikası Prezidentiniń 2026-jıl 5-fevral kúngi “2026-jılı aymaqlardı jańasha qatnasıqlar tiykarında rawajlandırıw arqalı xalıqtıń dáramatın arttırıw, turaqlı jumıs orınların jaratıw hám kámbaǵallıqtı qısqartıw ilajları haqqında”ǵı PQ-49-sanlı qararındaǵı 5-qosımshada sociallıq-ekonomikalıq kórsetkishler boyınsha saylap alınǵan awır kategoriyadaǵı rayonlar qatarında Bozataw rayonı kiritilgen.
Xalıq deputatları Bozataw rayonı Keńesiniń 2026-jıl 13-fevral kúngi VII-19-14-13-216-K/26 sanlı “Bozataw rayonında kámbaǵallıq dárejesi joqarı bolǵan awır kategoriyadaǵı Aspantay APJnıń qánigelesiwin tereńlestiriwge qaratılǵan reforma baǵdarlamasın tastıyıqlaw haqqında”ǵı sheshimine muwapıq, Aspantay APJ aymaǵında belgilengen wazıypalardıń orınlanıw jaǵdayın úyreniw, ámelge asırılıp atırǵan ilajlardıń nátiyjeliligin bahalaw hám aldaǵı wazıypalardı anıqlaw maqsetinde Xalıq deputatları Bozataw rayonı Keńesi deputatları tárepinen máhálle besligi aǵzaları menen keń túrde ushırasıw ótkerildi.
Ushırasıw dawamında Aspantay APJda kámbaǵallıqtı qısqartıw, xalıqtıń bántligin támiyinlew, jumıssız puqaralardı kásip-ónerge oqıtıw, ózin-ózi jumıs penen támiyinlewge járdem beriw, biznes hám shańaraq isbilermenligin rawajlandırıw, úy aldı qıytaq jerlerden nátiyjeli paydalanıw hám qosımsha kiris dereklerin jaratıw máselelerine ayrıqsha itibar qaratıldı.
Máhálle besligi tárepinen aymaqtaǵı sociallıq jaǵday, kámbaǵal shańaraqlar menen alıp barılıp atırǵan jumıslar, olardıń múrájatları hám áhmiyetli mashqalaları haqqında maǵlıwmat berildi.
Sonıń menen bir qatarda, «Kámbaǵallıqtan párawanlıqqa qaray» dástúri tiykarında jumıs alıp barıw, háreketke tayar bolǵan puqaralardı bizneske tartıw, imtiyazlı kreditlerden paydalanıw múmkinshiliklerin keńeytiw, mal sharwashılıǵı hám diyqanshılıq arqalı turaqlı dáramat dereklerin qáliplestiriw boyınsha alıp barılıp atırǵan ilajlar sóz etildi.
Deputatlar ushırasıw dawamında ayrım shańaraqlardıń elede sociallıq qollawǵa mútáj ekenligin, jumıs penen támiyinlew, infrastruktura, ishimlik suwı, elektr energiyası hám ishki kóshelerge baylanıslı ayrım mashqalalar bar ekenin atap ótti. Sol sebepli, hár bir mashqala boyınsha anıq is-ilajlar belgilep alınıp, olardı tiyisli shólkemler menen birgelikte sheshiw wazıypaları qoyıldı.
Sonday-aq, máhálle besligi aǵzalarına puqaralar menen jeke tártipte islewdi kúsheyttiriw, «temir dápter», «jaslar dápteri» hám «hayal-qızlar dápteri»nde turǵan puqaralardıń mashqalaların teriń úyreniw, olardıń bántligin támiyinlew hám sociallıq qollaw sharaların kóbeytiw boyınsha tiyisli usınıslar berildi.
Ushırasıw barısında reforma baǵdarlamasında belgilengen tapsırmalardı sapalı hám óz waqtında orınlaw, aymaqtaǵı hár bir shańaraq penen manzilli islew hám kámbaǵallıqtı qısqartıw boyınsha nátiyjeli mexanizmlerdi engiziw máseleleri boyınsha pikir almasıwlar alıp barıldı.
Ushırasıw juwmaǵında deputatlar hám máhálle besligi aǵzaları tárepinen Aspantay APJda xalıqtıń turmıs párawanlıǵın arttırıw, kámbaǵallıq dárejesin tómenletıw hám social-ekonomikalıq rawajlanıwdı támiyinlew boyınsha belgilengen wazıypalardı izbe-iz ámelge asırıw, reformalardıń orınlanıwın turaqlı baqlawǵa alıw hám bul boyınsha jámiyetshilik baqlawın kúsheyttiriw haqqında kelisip alındı.