Doimiy komissiyada favqulodda vaziyatlarning oldini olish masalasi muhokama qilindi

 🇺🇿 Bugun xalq deputatlari Uchtepa tumani Kengashidagi agrar, qurilish, kommunal sohalar, ekologiya, sanoat va transport masalalari bo‘yicha doimiy komissiyaning III chaqiriq 28-sessiyasi kun tartibiga kiritilgan muhim masalalardan biri — 2026-yil I choragi davomida favqulodda vaziyatlarning oldini olish borasida amalga oshirilgan ishlar yuzasidagi masala ko‘rib chiqildi.

 🦅 Mazkur masala yuzasidan Uchtepa tumani Favqulodda vaziyatlar bo‘limi boshlig‘i, podpolkovnik Ozodjon Jumayev tomonidan hisobot taqdim etildi. Hisobotda tumanda favqulodda vaziyatlarning oldini olish, aholi xavfsizligini ta’minlash, profilaktik tadbirlarni kuchaytirish hamda mavjud muammolarni bartaraf etish bo‘yicha amalga oshirilgan ishlar atroflicha yoritib berildi.

 📊 Shuningdek, so‘nggi 5 yil davomida sodir bo‘lgan favqulodda vaziyatlar, yong‘inlar, gaz-havo aralashmasining chaqnashi hamda is gazidan zaharlanish kabi baxtsiz hodisalar tahlil qilinib, 60 ta mahalla Favqulodda vaziyatlar vazirligi Akademiyasining professor-o‘qituvchilari va olimlari tomonidan chuqur o‘rganib chiqilgani ta’kidlandi. O‘rganishlar natijasida har bir mahalla kesimida aniq “yo‘l xaritalari” ishlab chiqilib, amalga oshirilishi lozim bo‘lgan ustuvor chora-tadbirlar belgilab olindi.

 🗣 Mahallalar ilmiy-texnik yondashuv asosida xavf indikatorlariga ko‘ra toifalarga ajratildi. Jumladan, 10 ta mahalla (16,6 foiz) “qizil”, 19 ta mahalla (31,6 foiz) “sariq” hamda 31 ta mahalla (51,8 foiz) “yashil” toifaga kiritildi. Ushbu tasnif hududlarda xavfsizlik darajasini baholash hamda manzilli profilaktika ishlarini tashkil etishda muhim ahamiyat kasb etadi.

 💬 Doimiy komissiya raisi Avaz Xudayberganov hamda komissiya a’zolari — K.Abdullayeva, S.Djalalov, A.Narziyev hamda F.Abdullayevlar hisobotni tinglab, o‘z saylov okruglarida uchrayotgan muammolar va tumandagi boshqa dolzarb masalalar yuzasidan savollar bilan murojaat qildilar. Savol-javoblar jarayonida mavjud kamchiliklar, ularni bartaraf etish yo‘llari hamda kelgusidagi ustuvor vazifalar yuzasidan taklif va tavsiyalar bildirildi.

 📱 Komissiya yig‘ilishi Zoom platformasi orqali tashkil etilib, unda tuman Kengashi kotibiyati mudiri Anvar Usmanov, bosh mutaxassislar U.Abilov va Z.Kuziyevalar ham ishtirok etdilar.

 📝 Muhokamalar yakunida barcha deputatlar tomonidan mazkur masalani sessiya kun tartibiga kiritish yuzasidan bir ovozdan qaror qabul qilindi.

 ✅ Mazkur jarayon hududda favqulodda vaziyatlarning oldini olish, tizimli ishlarni yanada kuchaytirish hamda aholining hayoti va sog‘lig‘ini ishonchli himoya qilishga xizmat qiladi.