Xalq deputatlari Chilonzor tuman kengashi deputati Nazirov Madamin Ma'rufjon o'g'li hamda Oliy Majlisi Qonunchilik palatasi deputati Durbek Axmedov tomonidan Chilonzor tumanining ijtimoiy-iqtisodiy rivojlantirish yuzasidan belgilangan chora-tadbirlar rejasi doirasida amalga oshirilishi ko‘zda tutilgan zamonaviy turar joy kompleksini qurish masalasi o‘rganildi.

Jumladan, 2-Charx Kamolon mahallasi hududida joylashgan eski ikki qavatli uy-joylarning texnik holati, aholi uchun yaratilgan shart-sharoitlar hamda hudud infratuzilmasining bugungi holati atroflicha tahlil qilindi.

O‘rganish jarayonida fuqarolar bilan muloqot o‘tkazilib, ularning taklif va murojaatlari tinglandi. Shuningdek, hududda aholi uchun qulay va zamonaviy infratuzilmaga ega bo‘lgan, barcha qulayliklarni o‘z ichiga olgan yangi turar joy majmuasini barpo etish bo‘yicha amaliy ishlar yuzasidan fikr almashildi.

Mas’ullar tomonidan qurilish ishlarini bosqichma-bosqich tashkil etish, aholi manfaatlarini inobatga olgan holda loyihani sifatli amalga oshirish hamda hududning obodonchiligini yanada yaxshilash bo‘yicha tegishli vazifalar belgilab olindi.