Hurmatli Prezidentimiz tomonidan yoshlar bilan bo‘lib o‘tgan ochiq muloqotda ilgari surilgan tashabbuslar mamlakatimizda yoshlar siyosati yangi bosqichga ko‘tarilayotganini yana bir bor yaqqol namoyon etdi.

Mazkur tashabbuslar, eng avvalo, yoshlarning tadbirkorlik faoliyatini qo‘llab-quvvatlash, ularni kasb-hunarga o‘qitish, innovatsion g‘oyalarini ro‘yobga chiqarish, bandligini ta’minlash va uy-joy sharoitlarini yaxshilashga qaratilgani bilan alohida ahamiyatlidir. Kredit mablag‘larining kengaytirilishi, imtiyozli moliyalashtirish mexanizmlari hamda startaplar tashkil etilishi, “Kelajak tadbirkori”, “Yangi avlod tadbirkorlari”, “Mening birinchi kasbim”, “Ikkinchi imkon” kabi dasturlar yoshlar uchun yangi imkoniyatlar eshigini ochadi.Shuningdek, ta’lim sifatini oshirish, xalqaro tajribani joriy etish, volontyorlik harakatini qo‘llab-quvvatlash, kitobxonlik madaniyatini rivojlantirish, yosh oilalarni ijtimoiy himoya qilishga qaratilgan chora-tadbirlar har tomonlama barkamol avlodni tarbiyalashga xizmat qiladi. Xalq deputatlari tuman Kengashi mazkur vazifalar ijrosini ta’minlash, har bir tashabbusni joylarda samarali amalga oshirish, ayniqsa, yoshlar bilan ishlash tizimini yanada kuchaytirish borasida mas’ul tashkilotlar bilan hamkorlikni izchil davom ettiradi. Har bir yoshning g‘oyasi, tashabbusi va intilishlari qo‘llab-quvvatlanishi — bizning ustuvor vazifamizdir. Ishonamizki, ushbu tarixiy tashabbuslar yoshlarimizning salohiyatini to‘liq namoyon etish, ularni yangi yutuqlar sari ruhlantirish hamda yurtimiz taraqqiyotiga munosib hissa qo‘shishlariga mustahkam zamin yaratadi.