Toyloq tumanida jadidchilik harakatining yirik namoyandasi, buyuk ma’rifatparvar Mahmudxo‘ja Behbudiy xotirasiga bag‘ishlangan keng qamrovli ma’naviy-ma’rifiy tadbir bo‘lib o‘tdi.

Tadbir avvalida O‘zbekistonda xizmat ko‘rsatgan jurnalist Farmon Toshev hamda Toyloq tumani hokimi tuman Kengashi rayisi Behzod Raxmatullayev hamda O‘zbekiston jurnalistika va ommaviy kommunikatsiyalar universiteti professori, O‘zbekiston Yozuvchilar uyushmasi aʼzosi Halim Saidov Behbudiy siymosining o‘zbek milliy uyg‘onishidagi o‘rni, uning ma’rifat, matbuot va teatr sohasidagi beqiyos xizmatlari haqida so‘z yuritdilar.

Shundan so‘ng “Mahmudxo‘ja Behbudiy bog‘i”ning ochilish marosimi o‘tkazildi. Marosimda Behbudiyning hayoti va faoliyati, uning millat taraqqiyoti yo‘lidagi fidokorona xizmatlari yodga olindi. Tadbir davomida Mahmudxo‘ja Behbudiyning chevarasi Shohruh Behbudiy so‘zga chiqib, ajdodlar merosini asrab-avaylash va uni yosh avlodga yetkazish muhimligini ta’kidladi. 

Tadbirda yig‘ilganlar bog‘da adib nomini abadiylashtirish maqsadida tashkil etilgan Behbudiy kutubxonasi, uy muzeyi hamda o‘quv markazi bilan yaqindan tanishdilar. Shuningdek, bog‘da Maxmudxo‘ja Behbudiy byustining ochilish marosimida qatnashdilar.