“Temiryo‘lchi” mahallasida kuz-qish mavsumiga tayyorgarlik doimiy komissiya hamda ekspert guruhi tomonidan joyiga chiqqan holda o‘rganildi.

Mazkur tadbir Xalq deputatlari Termiz shahar Kengashining 2026-yil 21-sentabrdagi VII-25-85-8-121-K/26-sonli qarori ijrosi yuzasidan tashkil etildi.

Nazorat-tahlil tadbirida Xalq deputatlari Termiz shahar Kengashining Mahalliy budjet, tadbirkorlikni rivojlantirish va iqtisodiy islohotlar masalalari bo‘yicha doimiy komissiyasi raisi A.Mustafakulov, Kengash kotibiyati mudiri A.Ashurov, bosh mutaxassisi R.Mamashukurov, ekspert guruhi a’zosi, 1-“Temiryo‘lchi” saylov okrugi deputati X.Fayzullayev hamda tegishli mutasaddi tashkilotlar vakillari ishtirok etdi.
O‘rganish davomida “Temiryo‘lchi” mahallasi, xususan, Uvaysiy ko‘chasida istiqomat qiluvchi fuqarolarning elektr ta’minoti bilan bog‘liq murojaatlari atroflicha tahlil qilindi.

Fuqarolarning ta’kidlashicha, ko‘chada elektr energiyasi ta’minotining barqarorligi va sifati bilan bog‘liq muammolar mavjud.

Jumladan, elektr kuchlanishining me’yoridan pastligi sababli aholining maishiy elektr jihozlaridan to‘laqonli foydalanish imkoniyati cheklanayotgani, kuchlanishdagi o‘zgarishlar esa ayrim qurilmalarning nosoz holatga kelishiga sabab bo‘layotgani qayd etildi.

Shuningdek, hududga xizmat ko‘rsatuvchi transformator punktining mavjud quvvati iste’mol yuklamasiga mos kelmasligi natijasida elektr tarmog‘ida ortiqcha yuklama yuzaga kelayotgani va buning oqibatida elektr ta’minotida uzilishlar kuzatilayotgani bildirildi.

🏗️ Kuz-qish mavsumiga tayyorgarlik — amaliy nazoratda

Kuz-qish mavsumini betalafot o‘tkazish uchun hududlarda elektr, issiqlik, suv va boshqa muhandislik-kommunikatsiya tarmoqlarining barqaror ishlashi muhim ahamiyatga ega.

Shu nuqtayi nazardan, Uvaysiy ko‘chasidagi elektr tarmoqlarining texnik holati, jumladan, ayrim eskirgan yog‘och tayanchlar ham ko‘zdan kechirildi.

Ayrim tayanchlarning yaroqsiz holatga kelgani qayd etilib, ularni zamonaviy beton tayanchlarga almashtirish, elektr tarmoqlarini texnik jihatdan tartibga keltirish hamda hududdagi elektr ta’minoti barqarorligini oshirish zarurligi ta’kidlandi.

📌 Qaror ijrosi — faqat hisobotda emas, joylarda

Nazorat-tahlil tadbirining ahamiyatli jihati shundaki, Kengash qarorida belgilangan vazifalar joyiga chiqqan holda, aholi murojaatlari bilan bog‘liq real holatlar asosida o‘rganilmoqda.

Aniqlangan muammolar tegishli mutasaddi tashkilotlar vakillari bilan muhokama qilinib, ularni bartaraf etish yuzasidan amaliy choralar belgilandi.

Doimiy komissiya va ekspert guruhi tomonidan aniqlangan kamchiliklar bo‘yicha tegishli tashkilotlarga deputatlik so‘rovlari yuborish, muammolarni bartaraf etish choralarini ko‘rish hamda amalga oshirilgan ishlarning natijadorligini qayta nazorat qilish belgilandi.

Kengash qarori — hisobot uchun emas, natija uchun. Doimiy komissiya va ekspert guruhi esa uning ijrosini joylarda o‘rganish va amaliy natijaga erishish bo‘yicha nazoratni davom ettiradi.