Yangi 2024–2025 o‘quv yili boshlanishi munosabati bilan Termiz tumanidagi umumta’lim maktablarida tantanali ochilish tadbirlari bo‘lib o‘tdi. Ushbu tadbirlarda Termiz tuman Kengashi deputatlari, jumladan deputat Ruziyeva Nasiba ham faol ishtirok etdi.

Deputatlar o‘quvchilarni yangi o‘quv yilining boshlanishi bilan tabriklab, ularning bilim olishida omad va zafarlar tiladilar. Ustoz va murabbiylarga esa yosh avlodni tarbiyalash yo‘lidagi mehnatlari uchun minnatdorlik bildirib, kelgusida yanada yuksak muvaffaqiyatlar yor bo‘lishini ta’kidladilar.

Deputat Ruziyeva Nasiba o‘z tabrigida maktab ta’limining jamiyat taraqqiyotidagi o‘rni va ahamiyatini alohida qayd etib, yoshlarni bilimli, ma’naviy barkamol shaxs bo‘lib voyaga yetishga chorlovchi ezgu tilaklarini bildirdi.

Shuningdek, tadbir davomida maktablarda yaratilgan sharoitlar, ta’lim-tarbiya jarayonining samarali tashkil etilishi ham ko‘zdan kechirildi. O‘quvchilar tayyorlagan badiiy chiqishlar esa bayramona ruh bag‘ishladi.