Xalq deputatlari Marg‘ilon shahar Kengashining Agrar, suv xo‘jaligi va ekologiya masalalari bo‘yicha doimiy komissiyasi ish rejasiga muvofiq, shahardagi sanitar-epidemiologik holat hamda chiqindilarni o‘z vaqtida olib chiqib ketish bo‘yicha amalga oshirilgan ishlar yuzasidan mutasaddi tashkilotlarning hisoboti eshitildi. Yig‘ilish doimiy komissiya raisi Z.Domilayev tomonidan olib borildi. Unda shahar Kengashi kotibiyat mudiri A.Ermatov ham ishtirok etdi.

Hisobotga ko‘ra, 2026-yilning 1-choragi davomida Marg‘ilon shahar sanitariya-epidemiologiya osoyishtaligi va jamoat salomatligi bo‘limi tomonidan jami 38 ta tekshiruv o‘tkazilgan. Shundan 7 tasi tadbirkorlik subyektlarida, 6 tasi kommunal sohada (ulardan 3 tasi tadbirkorlik subyektlarida), 20 tasi esa bolalar va o‘smirlar gigiyenasi yo‘nalishida amalga oshirilgan.

O‘tkazilgan nazorat tadbirlari natijasida aniqlangan qonunbuzilishlar yuzasidan 25 ta jarima qo‘llanilib, ularning umumiy summasi 95 million 584 ming so‘mni tashkil etdi. Shundan 41 million 522 ming so‘m undirilgan. Ayrim tadbirkorlik subyektlariga oid hujjatlar esa qonuniy choralar ko‘rish uchun sud organlariga taqdim etilgan.

Laboratoriya tekshiruvlari ham tizimli ravishda olib borildi. Jumladan, sanitariya-gigiyena laboratoriyasi tomonidan oziq-ovqat mahsulotlaridan 51 ta, ichimlik suvlaridan 160 ta hamda atmosfera havosi va boshqa omillardan 2177 ta namunalar olinib, tahlil qilindi. Bakteriologiya laboratoriyasida 3960 ta tahlil, parazitologiya yo‘nalishida esa 4762 nafar fuqarodan 5087 ta tahlil o‘rganildi.

Kasalliklarning oldini olish va ularning tarqalishini cheklash maqsadida zararsizlantirish ishlari ham keng ko‘lamda amalga oshirildi. Xususan, virusli gepatit, o‘tkir ichak kasalliklari hamda boshqa infeksiya o‘choqlarida jami 178 ta dezinfeksiya tadbirlari o‘tkazildi. Shuningdek, amalga oshirilgan ishlar samaradorligini ta’minlash maqsadida 70 ta nazorat namunasi qayta tahlildan o‘tkazildi.

Aholidan kelib tushayotgan murojaatlar ham e’tibordan chetda qolmayapti. Hisobot davrida portal orqali kelib tushgan 5 ta murojaatning barchasi o‘z vaqtida ijobiy hal etildi. Bundan tashqari, viloyat darajasidan kelib tushgan 30 ta ko‘rsatma xatlari ham o‘z muddatida ijro etilgan. Shahar hokimligi tomonidan berilgan topshiriqlar ijrosi ham to‘liq ta’minlanmoqda.

Mazkur masala yuzasidan deputatlar tomonidan atroflicha muzokaralar olib borilib, sohada mavjud muammolar, ularni bartaraf etish choralariga alohida e’tibor qaratildi. Muhokamalar davomida sanitariya holatini yanada yaxshilash, chiqindilarni o‘z vaqtida olib chiqish tizimini takomillashtirish hamda aholining sanitariya madaniyatini oshirish bo‘yicha qator taklif va tavsiyalar bildirildi.

Yig‘ilish yakunida kun tartibidagi masala yuzasidan tegishli qaror qabul qilinib, mas’ul tashkilotlarga aniq vazifalar belgilab berildi hamda ularning ijrosi ustidan nazorat o‘rnatilishi ta’kidlandi.