Xalq deputatlari Ishtixon tumani Kengashi deputati Rasulov Jamshid G‘ulomovich tomonidan Ishtixon tuman Yo‘llardan foydalanish unitar korxonasi direktoriga rasmiy deputat so‘rovi yuborildi.

So‘rovda Ishtixon tumanidagi “Qo‘ng‘irot” hamda “Azamat” mahallalarini bog‘lovchi avtomobil yo‘lining bugungi ayanchli holati keskin ko‘tarilgan.

📌 Mazkur yo‘l yillar davomida ta’mirlanmagan.

📌 Qoplama yaroqsiz holga kelgan, chuqur va o‘nqir-cho‘nqirlar ko‘paygan.

📌 Yomg‘irli kunlarda yo‘l deyarli yaroqsiz ahvolga tushadi.

📌 Aholining piyoda va transportda harakatlanishi jiddiy qiyinlashmoqda.

Ilova qilingan rasmlarda ko‘rinib turibdiki, yo‘l yuzasi katta-katta ko‘lmaklarga aylangan. Bu esa nafaqat noqulaylik, balki xavfsizlik masalasini ham kun tartibiga olib chiqadi. Ayniqsa, maktab o‘quvchilari, keksalar va bemorlar uchun bu yo‘ldan foydalanish muammoga aylangan.

❗ Savol tug‘iladi: nega bu masala yillar davomida e’tiborsiz qoldirildi?

❗ Mas’ul tashkilotlar tomonidan rejalashtirish va nazorat qay darajada olib borilgan?

Deputat so‘roviga ko‘ra:

Yo‘lni ta’mirlash bo‘yicha aniq chora-tadbirlar belgilanishi;

Reja va muddatlar yuzasidan rasmiy ma’lumot taqdim etilishi;

Muammo qachon va qanday hal etilishi ochiq ko‘rsatilishi talab etilgan.

Qonunchilikka asosan, deputat so‘roviga 10 kun muddatda javob berilishi shart. Belgilangan muddatda asoslantirilgan va aniq javob taqdim etilishi – nafaqat huquqiy majburiyat, balki aholi oldidagi mas’uliyat hamdir.

Yo‘l – bu oddiy asfalt emas. Bu odamlarning ishga, maktabga, shifoxonaga borish yo‘li. Bu hudud taraqqiyotining ko‘zgusi.

Mazkur masala jamoatchilik nazoratida bo‘ladi. Javob va amaliy harakat kutilmoqda.