Xalq deputatlari Ishtixon tuman Kengashi deputati E.Abdusalomov tomonidan “Hazarbobo” va "Yangiravot" mahallalarini bog‘laydigan yo‘lning holatini o‘rgandi.

Hududdagi ichki ko‘chalarning bugungi holati jiddiy tanqidiy bahoga loyiq. Yomg‘ir yog‘ishi bilan yo‘llar loyqa botqoqqa aylanmoqda, katta-kichik chuqurlar suvga to‘lib, harakatlanish deyarli imkonsiz bo‘lib qolmoqda. Avtomobillar zo‘rg‘a yurmoqda, piyodalar esa loy va suv ichida qatnashga majbur. Bu nafaqat noqulaylik, balki aholi xavfsizligi uchun ham real xavf tug‘dirmoqda.

Eng achinarlisi, mazkur muammo bir kunlik yoki mavsumiy holat emas. Aholi tomonidan bir necha bor og‘zaki murojaatlar bildirilganiga qaramay, mas’ul tashkilotlar tomonidan amaliy va barqaror yechim ko‘rilmagan. Vaqtinchalik tekislash yoki yuzaki shag‘al tashlash bilan masala hal bo‘lmaydi. Natijada har bir yomg‘irdan so‘ng vaziyat yana takrorlanmoqda.

Savol tug‘iladi: hudud infratuzilmasi bilan bog‘liq bu muammo qachongacha e’tibordan chetda qoladi? Ichki yo‘llarning bunday ahvoli ijtimoiy soha obyektlariga, tez yordam, yong‘in xavfsizligi xizmatlarining o‘z vaqtida yetib borishiga ham salbiy ta’sir ko‘rsatishi mumkin.

Mazkur holat yuzasidan deputat E.Abdusalomov tomonidan tegishli tashkilotlarga rasmiy deputatlik so‘rovi chiqarildi.

So‘rovda:

ichki ko‘chalarni to‘liq shag‘allashtirish va mustahkamlash;

suvning to‘planib qolishini oldini olish uchun drenaj tizimini yo‘lga qo‘yish;

mas’ul tashkilotlarning aniq muddatli chora-tadbirlar rejasini taqdim etishi talab etildi.

Hudud aholisining kundalik hayotiga ta’sir qilayotgan bunday muammolarni cho‘zib yurish — mas’uliyatdan qochish bilan barobar. Endilikda mas’ul tashkilotlar aniq javob va amaliy ish bilan chiqishi lozim.