Joriy yilning 24-fevral kuni xalq deputatlari tuman Kengashi deputati Perizat Mingtaeva o‘z saylov okrugidagi “Guliston” mahalla fuqarolar yig‘inida amalga oshirilayotgan ijtimoiy-iqtisodiy ishlar holatini o‘rganish maqsadida o‘rganish va muloqot uchrashuvi o‘tkazdi.

Tashrif davomida deputat, avvalo, mahallada faoliyat yuritayotgan ijtimoiy xodim tomonidan aholining ijtimoiy ehtiyojmand qatlamlariga ko‘rsatilayotgan xizmatlar sifatini tahlil qildi. Xususan, “Ijtimoiy himoya yagona reestri” orqali kam ta’minlangan oilalarni aniqlash, ularga ijtimoiy nafaqa va moddiy yordam tayinlash, to‘lovlarning o‘z vaqtida va shaffof amalga oshirilishi holati atroflicha ko‘rib chiqildi. 

Ehtiyojmand oilalarning uy-joy sharoiti, daromad manbalari va real ehtiyojlarini o‘rganishda manzilli yondashuvni kuchaytirish bo‘yicha takliflar berildi. Shuningdek, mahalla soliq inspektori tomonidan hududda tadbirkorlikni rivojlantirish, o‘zini o‘zi band qilgan fuqarolarni rasmiy ro‘yxatdan o‘tkazish, soliq to‘lov intizomini ta’minlash va yangi ish o‘rinlari yaratish borasida amalga oshirilayotgan ishlar holati yuzasidan ma’lumotlar tinglandi. 

Ayniqsa, kam ta’minlangan oilalar a’zolarini kasb-hunarga o‘qitish va tadbirkorlikka jalb etish orqali ularning daromadini oshirish choralari muhokama qilindi.

Mahalladagi xotin-qizlar faoli tomonidan ayollarning bandligini ta’minlash, ijtimoiy himoyaga muhtoj xotin-qizlarni qo‘llab-quvvatlash, ularning huquqiy savodxonligini oshirish va tazyiq hamda zo‘ravonlikning oldini olish bo‘yicha olib borilayotgan ishlar yuzasidan ham hisobot berildi.

Deputat tomonidan ayollarning tadbirkorlik tashabbuslarini qo‘llab-quvvatlash, imtiyozli kredit va subsidiyalardan samarali foydalanish bo‘yicha amaliy tavsiyalar bildirildi.

Tashrif so‘ngida mahallada ijtimoiy himoya tizimini yanada takomillashtirish, idoralararo hamkorlikni kuchaytirish, aholining bandligini ta’minlash va ijtimoiy adolat tamoyillarini mustahkamlash bo‘yicha amaliy chora-tadbirlar rejasi belgilab olindi.