🔰Xalq deputatlari Chinoz tumani Kengashi deputati Mirsoat Mirsodiqov Alisher Navoiy mahallasida bo‘lib, hududda amalga oshirilayotgan ishlar bilan yaqindan tanishdi. Jumladan, mahalladagi yoshlar yetakchisi tomonidan tashkil etilayotgan tadbirlar samaradorligi, yoshlarning ijtimoiy faolligi hamda bandligini ta’minlash holati atroflicha o‘rganildi.

📖Uchrashuv davomida mahalla faollari, nuroniylar va mas’ul shaxslar ishtirokida ochiq va samimiy muloqot bo‘lib o‘tdi. Unda yoshlarni kasb-hunarga yo‘naltirish, tadbirkorlikka jalb etish, bo‘sh vaqtlarini mazmunli tashkil etish, shuningdek, aholini qiynayotgan dolzarb masalalar yuzasidan fikr almashildi. Bildirilgan taklif va mulohazalar deputat tomonidan e’tiborga olinib, ularni bartaraf etish bo‘yicha tegishli chora-tadbirlar ko‘rish zarurligi ta’kidlandi.

♻️Shuningdek, mahallada qonun ustuvorligini mustahkamlash, yoshlar orasida sog‘lom turmush tarzini targ‘ib qilish hamda fuqarolarning ijtimoiy faolligini oshirish borasida olib borilayotgan ishlar ijobiy baholandi. Deputat Mirsoat Mirsodiqov kelgusida ham mahallalar bilan yaqin hamkorlikda ishlash, aholi manfaatlariga xizmat qiladigan tashabbuslarni qo‘llab-quvvatlash muhimligini qayd etdi.