💼 Kuni kecha "Adolat" sotsial-demokratik partiyasi Toshkent shahar Kengashining kengaytirilgan yig‘ilishi bo‘lib o‘tdi. Unda xalq deputatlari Toshkent shahar hamda tuman Kengashlaridagi deputatlik korpusi vakillari faol ishtirok etdi. Xususan, Uchtepa tumani deputatlari — F.Abdullayev, K.Azizov, S.Malikova, I.Abdullayev va A.Usmanovlar mazkur tanqidiy ruhda o‘tgan yig‘ilishda qatnashdilar.

 💬 Yig‘ilish davomida deputatlarning saylovchilar bilan ishlash samaradorligini oshirish masalasi asosiy e’tibor markazida bo‘ldi. Partiyaning Toshkent shahar Kengashi raisi M.E.Dadaxodjayeva o‘z nutqida deputatlik faoliyatida ochiq va doimiy muloqotni yo‘lga qo‘yish muhim ahamiyat kasb etishini alohida ta’kidladi. Shu munosabat bilan har bir deputat oyiga kamida bir marotaba saylovchilar bilan bevosita uchrashuvlar o‘tkazishi, hududlardagi dolzarb muammolarni joyiga chiqib o‘rganishi hamda ularning yechimiga amaliy ko‘mak ko‘rsatishi zarurligi qayd etildi.

 📇 Shuningdek, deputatlik faoliyatining shaffofligi va samaradorligini ta’minlash maqsadida har chorak yakunida saylovchilarga bajarilgan ishlar yuzasidan batafsil axborot berib borish lozimligi alohida urg‘ulandi. Bu talablar deputatlarning xalq oldidagi mas’uliyatini yanada oshirish, fuqarolar bilan bevosita aloqa mexanizmlarini kuchaytirish hamda hududlardagi muammolarni tezkor aniqlash va samarali hal etishga xizmat qilishi ta’kidlandi.

 📁 Bugungi kunda Uchtepa tumanida “Adolat” SDPdan saylangan 8 nafar deputat faoliyat yuritmoqda. Ular tomonidan mahallalarda mavjud muammolarni joyiga chiqib o‘rganish, fuqarolar murojaatlarini hal etish hamda amaliy yordam ko‘rsatish borasida tizimli ishlar olib borilmoqda. Jumladan, joriy yilning birinchi choragida 4 ta deputatlik so‘rovi chiqarilgan bo‘lib, bu orqali qator dolzarb masalalar ko‘tarildi. Bundan tashqari, sessiya kun tartibiga kiritish uchun 2 ta deputatlik guruhi taklifi ilgari surildi.

 📊 Shu bilan birga, yig‘ilishda amalga oshirilayotgan ishlar hali yetarli darajada emasligi, mavjud imkoniyatlardan to‘liq foydalanilmayotgani ham tanqidiy ruhda qayd etildi. Deputatlar bundan tegishli xulosa chiqarib, o‘z faoliyatini yanada kuchaytirishi zarurligi ta’kidlandi.

 ↗️ Yig‘ilish yakunida partiya a’zoligi va a’zolik badallari masalasiga ham alohida to‘xtalib o‘tildi. Ushbu yo‘nalishda tartib-intizomni mustahkamlash, belgilangan vazifalarni o‘z vaqtida bajarish bo‘yicha tegishli ko‘rsatmalar berildi.

 🗣 Umuman olganda, mazkur yig‘ilish deputatlik faoliyatini yangi bosqichga olib chiqish, saylovchilar bilan samarali muloqotni yo‘lga qo‘yish hamda hududlardagi muammolarni hal etishda amaliy natijadorlikni oshirishga xizmat qilishi bilan ahamiyatli bo‘ldi.