Milliy meros va zamonaviy bilim — barkamol avlod tarbiyasining ikki tayanchi

Xalq deputatlari Taxiatosh tumani Kengashiga O‘zbekiston Milliy tiklanish demokratik partiyasidan saylangan deputat Daubaeva Bazargul Maxammatdinovna Prezident Shavkat Mirziyoyevning Qoraqalpog‘istonga tashrifi davomida belgilangan vazifalar yuzasidan o‘z munosabatini bildirdi.

💬 Har bir xalqning kuchi, avvalo, uning o‘zligini anglashida, milliy merosini qadrlashi va uni kelajak avlodga yetkaza olishida namoyon bo‘ladi.

Qoraqalpog‘istonga tashrif davomida buyuk shoir va mutafakkir Berdaq Qarg‘abay o‘g‘li tavalludining 200 yilligini munosib nishonlash, uning ilmiy-ijodiy merosini o‘rganish, raqamlashtirish, asrab-avaylash va yoshlar orasida keng targ‘ib qilish bo‘yicha muhim vazifalar belgilandi.

Bu tashabbusni maktab hayotidan alohida tasavvur qilib bo‘lmaydi. Chunki milliy merosning kelajak avlodga yetib boradigan eng muhim maskanlaridan biri — maktab.

O‘quvchi Berdaq ijodini shunchaki darslikdagi mavzu sifatida emas, xalq tarixi, milliy tafakkur va ma’naviy qadriyatlarimizning bir qismi sifatida anglab yetishi muhim.

Shu bilan birga, bugungi avlod zamonaviy bilim va texnologiyalarni ham egallashi kerak. Milliy o‘zlikni anglash va zamonaviy bilimga intilish bir-birini to‘ldirgandagina barkamol avlodni tarbiyalash mumkin.

Maktab rahbari va deputat sifatida ushbu tashabbusni yoshlar qalbiga milliy merosimizga hurmat, tariximizga qiziqish va kelajakka mas’uliyat tuyg‘usini singdirish uchun muhim imkoniyat, deb bilaman.
📖 Milliy meros — kechagi tariximiz, uni asrab-avaylash va yosh avlodga yetkazish esa bugungi avlodning mas’uliyatidir.

— Daubaeva Bazargul Maxammatdinovna
O‘zbekiston Milliy tiklanish demokratik partiyasidan saylangan deputat.