Sayyor qabul: aholi murojaatlari joyida hal etilmoqda

Xalq deputatlari Namangan viloyati Kengashi raisi S. Muminov boshchiligida aholi bilan bevosita va ochiq muloqotni ta’minlash, joylardagi mavjud muammolarni aniqlash hamda ularni tezkorlik bilan bartaraf etish maqsadida sayyor qabullar o‘tkazilmoqda.

Joriy sayyor qabul Namangan shahar 22-Barakmol avlod saylov okrugi hududiga kiruvchi mahallalarda fuqarolar bilan uchrashuv tarzida tashkil etildi.

Unda Namangan shahar Kengashi deputatlari Z. Sapaev, S. Gapparova va B. Xalilov ham ishtirok etdi.

Qabul jarayonida 15 nafardan ortiq fuqarolar tomonidan turli yo‘nalishlarda jami 19 ta murojaat bildirildi. Murojaatlarning 12 tasi joyning o‘zida ijobiy hal etildi. Qolgan 7 ta masala esa qo‘shimcha o‘rganishni talab etgani bois, tegishli tartibda ijroga qabul qilindi.

Sayyor qabullar orqali aholi muammolarini joyida hal etish, fuqarolar roziligini ta’minlash, shuningdek deputatlik faoliyatida ochiqlik va samaradorlikni yanada oshirishga alohida e’tibor qaratilmoqda.