#deputat_soʻrovi #poytaxtdeputatlari #deputatlik_faoliyati

❗️ “39-Minor” saylov okrugida bolalar va sport maydonchalarini rivojlantirish masalalari deputatlik so‘rovi orqali ko‘tarildi

🏛 Xalq deputatlari Toshkent shahar Kengashining “39-Minor” saylov okrugi deputati Nigora Eshmetova tomonidan hududdagi ijtimoiy soha obyektlari va mahalla fuqarolar yig‘inlarida olib borilgan o‘rganishlar hamda aholidan kelib tushgan murojaatlar asosida Yunusobod tumani hokimi A.Saidaliyev nomiga deputatlik so‘rovi yuborildi.

📩 O‘rganishlar davomida “Xiyobontepa”, “Bodomzor” va “Otchopar-2” mahallalarida bolalar hamda yoshlarning sport bilan shug‘ullanishi, bo‘sh vaqtini mazmunli tashkil etishi uchun zarur infratuzilmani yaxshilash, mavjud sport obyektlarini ta’mirlash va yangi maydonchalar tashkil etish bilan bog‘liq qator masalalar ko‘tarilgan.

🔺 Xususan, “Xiyobontepa” MFY hududidagi Bog‘ishamol ko‘chasi, 57/7-uy oldiga zamonaviy vorkaut (Workout) jamlanmasini o‘rnatish, “Bodomzor” MFYda bolalar maydonchasi mavjud emasligini inobatga olib, yangi zamonaviy bolalar maydonchasini barpo etish masalalarida amaliy yordam so‘ralgan.

🔎 Shuningdek, “Otchopar-2” MFY hududidagi Otchopar ko‘chasi, 80-uy ro‘parasida joylashgan ta’mirtalab kichik futbol maydonchasini rekonstruksiya qilib, bolalar va yoshlar uchun zamonaviy futbol maydoniga aylantirish masalasi ham deputatlik so‘rovida alohida ko‘tarildi.

🌳 Shu bilan birga, Shivli va Qozitarnov ko‘chalari kesishmasida vorkaut sport maydonchasi tashkil etish uchun yer maydoni ajratish va mazkur obyektni qurish, Shivli va Oqqorg‘on ko‘chalari kesishmasida aholi tomonidan noqonuniy egallangan yer maydonlari o‘rnida bolalar maydonchasi tashkil etish uchun tegishli yer maydonini tasdiqlash hamda yangi maydoncha barpo etish imkoniyatlarini ko‘rib chiqish so‘raldi.

📉 Deputat Nigora Eshmetova 424-sonli davlat maktabgacha ta’lim tashkiloti hududidagi bolalar maydonchalarini ham zamonaviy o‘yin va sport jihozlari, arg‘imchoqlar, tebranish moslamalari hamda turli o‘yin majmualari bilan jihozlash masalasini ko‘tardi.

📝 Shu munosabat bilan deputat tomonidan “Xalq deputatlari viloyat, tuman va shahar Kengashi deputatining maqomi to‘g‘risida”gi Qonunning 5 va 8-moddalariga asosan Yunusobod tumani hokimi A.Saidaliyevdan ko‘tarilgan masalalarni tegishli mutaxassislar ishtirokida o‘rganish, ularni hal etish imkoniyatlarini ko‘rib chiqish hamda mazkur ijtimoiy soha obyektlari va mahallalardagi muammolar Yunusobod tumanining yaqin istiqboldagi ijtimoiy-iqtisodiy rivojlantirish dasturlariga kiritilgan yoki kiritilmaganligi yuzasidan asoslantirilgan ma’lumot taqdim etish so‘raldi.

⏳ Deputatlik so‘rovida o‘rganish natijalari, amalga oshirilishi rejalashtirilayotgan ishlar va tegishli dasturlarga kiritilishi bo‘yicha ma’lumotlarni 10 kun muddatda taqdim etish belgilangan.

🤝 Mazkur masalalar deputat Nigora Eshmetova tomonidan nazoratga olingan.

📱 Telegram 📱 Instagram 📱 Facebook 📱 YouTube 🔎 E-kengash