Xalq deputatlari Ishtixon tuman Kengashi deputati N.Kiyamov o‘z saylov okrugidagi Qo‘chqor Qarshiyev mahallasida mahalla xotin-qizlar faoli tomonidan amalga oshirilayotgan ishlar samaradorligi yuzasidan o‘rganish olib bordi.

O‘rganish jarayonida mahallada xotin-qizlarni har tomonlama qo‘llab-quvvatlash, ularning ijtimoiy faolligini oshirish, bandligini ta’minlash hamda muammolarini tizimli ravishda hal etish borasida amalga oshirilayotgan ishlar atroflicha ko‘zdan kechirildi. Jumladan, Qo‘chqorova Gulnoza 2022-yildan buyon mazkur mahallada xotin-qizlar faoli sifatida samarali faoliyat yuritib kelmoqda.

Shuningdek, 2026-yil uchun “Ayollar daftari”ning 7-bosqichiga 85 nafar xotin-qizlarning kiritilgani, ularning ijtimoiy himoyasini kuchaytirish hamda moddiy va ma’naviy qo‘llab-quvvatlashga qaratilgan amaliy ishlar olib borilayotgani qayd etildi.

Bundan tashqari, mahallada ijtimoiy himoyaga muhtoj bo‘lgan xotin-qizlarni kasb-hunarga o‘qitish, ularni doimiy ish bilan ta’minlash, tadbirkorlik faoliyatiga jalb etish hamda oilaviy daromad manbalarini shakllantirishga ko‘maklashish borasida tizimli ishlar yo‘lga qo‘yilgan. Mazkur sa’y-harakatlar orqali xotin-qizlarning jamiyatdagi o‘rni va faolligini oshirish, ularning turmush sharoitlarini yaxshilash hamda ijtimoiy muammolarini bartaraf etish maqsad qilingan.

O‘rganish yakunida mahallada xotin-qizlar bilan ishlash yo‘nalishida amalga oshirilayotgan ishlar samaradorligini yanada oshirish, ularning bandligini ta’minlash hamda ijtimoiy qo‘llab-quvvatlash choralarini kuchaytirish yuzasidan tegishli tavsiyalar berildi.