Dehqonobod tumani hokimi, xalq deputatlari Dehqonobod tuman Kengashiga 13-Oybek saylov okrugidan saylangan deputat Sherzod Shokirov tomonidan Oybek va Oqqishloq mahallalarida o‘tkazilgan ochiq muloqotlar davomida fuqarolar tomonidan bildirilgan muammo va takliflar joyiga chiqib, atroflicha o‘rganildi. Jarayonda hududdagi qator ijtimoiy obyektlar, jumladan, ta’lim muassasalari faoliyati ham ko‘zdan kechirilib, mavjud sharoitlar va ularning bugungi holatiga alohida e’tibor
qaratildi. 

O‘rganishlar davomida bir nechta umumta’lim maktablari faoliyati joyida ko‘zdan kechirildi. Xususan, 58-maktab filialida aniqlangan kamchiliklar tanqidiy muhokama qilindi. Ta’lim muassasasida hududni obodonlashtirish, ichki tartib-intizomni mustahkamlash, o‘quvchilar uchun yaratilgan sharoitlar hamda mas’ul xodimlarning o‘z vazifasiga yetarlicha e’tibor qaratmayotgani keskin tanqid ostiga olindi. Tuman hokimi tomonidan maktab rahbariyati va mas’ullarga mavjud kamchiliklarni zudlik bilan bartaraf etish, ta’lim sifatini oshirish, muassasa hududini tartibga keltirish hamda bu borada shaxsiy mas’uliyatni kuchaytirish yuzasidan aniq topshiriqlar berildi. 

Shuningdek, o‘rganishlar jarayonida tuman rahbari bir guruh fuqarolar xonadonlarida bo‘lib, ularning turmush sharoiti bilan yaqindan tanishdi, muammolarini tingladi va ularni hal etish bo‘yicha tegishli mutasaddilarga vazifalar yukladi. 

Ta’kidlanganidek, hududlarda olib borilayotgan bunday o‘rganish va ochiq muloqotlar aholi muammolarini joyida hal etish, ijtimoiy obyektlar faoliyatini yanada takomillashtirish hamda fuqarolar uchun munosib sharoitlar yaratishda muhim ahamiyat kasb etadi.