Tuman Kengashi deputati Muattar Mirzajonova Boyovut tumani "U.Yusupov" mahallasida istiqomat qiluvchi D.Mamatqulova xonadonida bo‘ldi.

Dilorom opa Mamatqulova — buvilarimizdan meros bo‘lib qolgan kurok ko‘rpacha tikish san’atini nafaqat asrab qolayotgan, balki uni zamonaviy dizayn va uslublar bilan uyg‘unlashtirib, yosh avlodga o‘rgatayotgan haqiqiy ustoz-amaliyotchidir.

Ko‘p yillik tajribaga ega bo‘lgan Mamatqulova hozirda bir nechta shogirdlarga hunar o‘rgatib, mahalliy ayollar bandligini ta’minlashga o‘z hissasini qo‘shmoqda. Bu kabi tashabbuslar — mahallada ijtimoiy faollikni oshirish, milliy hunarmandchilik an’analarini asrash va yangi avlodga yetkazishda muhim o‘rin tutadi.

Deputat Muattar Mirzajonova ushbu tashabbusni yuqori baholadi, hunar egasiga minnatdorchilik bildirib, shogirdlarga kerakli ko‘mak va tavsiyalar berilishini ta’kidladi.

An’anaviy qadriyatlar va zamonaviy yondashuv uyg‘unligi — Boyovut ayollarining kuch-g‘ayrati va fidoyiligining yorqin namunasidir.