Xalq deputatlari Qo‘qon shahar Kengashi deputati O.Bozorov tomonidan “Degrizlik” mahallasida sport infratuzilmasini rivojlantirish va yoshlar uchun munosib shart-sharoitlar yaratish yuzasidan navbatdagi deputatlik so‘rovi yuborildi.

Saylovchilar bilan o‘tkazilgan uchrashuvlar hamda “Degrizlik” mahallasida olib borilgan o‘rganishlar davomida fuqarolar va yoshlar tomonidan hududdagi bo‘sh yer maydonida zamonaviy sport maydonchasi yoki workout majmuasi barpo etish bo‘yicha takliflar bildirildi.

️Mahalladagi bo‘sh yer maydonini obodonlashtirish, undan samarali foydalanish hamda yoshlarning sport bilan shug‘ullanishi uchun qulay sharoit yaratish maqsadida deputat tomonidan Qo‘qon shahar hokimi o‘rinbosari N.Nasimov nomiga deputatlik so‘rovi yuborildi.

Deputatlik so‘rovida “Degrizlik” mahallasi hududidagi bo‘sh yer maydonida zamonaviy sport maydonchasi yoki workout majmuasini barpo etish masalasini tegishli mutasaddilar bilan birgalikda atroflicha o‘rganish hamda uni amalga oshirish imkoniyatlarini ko‘rib chiqish so‘ralgan.

Shuningdek, shahar Yoshlar ishlari bo‘limi bilan hamkorlikda mazkur tashabbusni amalga oshirish, jumladan, “Yoshlar daftari” jamg‘armasi mablag‘lari hisobidan sport maydonchasi yoki workout majmuasini tashkil etish imkoniyatlarini o‘rganish taklifi ilgari surilgan.

Mazkur masala deputat nazoratiga olingan bo‘lib, deputatlik so‘roviga qonunchilikda belgilangan muddatda javob olinishi hamda tashabbusni amalga oshirish yuzasidan ko‘riladigan choralar kuzatib boriladi.

Xalq deputatlari Qo‘qon shahar Kengashi