ЁШЛАР БИЛАН ПРОФИЛАКТИК ИШЛАР: «НАМУНАЛИ МАҲАЛЛА» ТАЖРИБАСИ
Янгиқўрғон туманида ёшлар билан манзилли ишлаш, уларнинг бўш вақтини мазмунли ташкил этиш ҳамда ҳуқуқбузарликларнинг олдини олишга қаратилган профилактик тадбирлар самарадорлигини ошириш бўйича тақдимот ўтказилди.
Туман ҳокими, Халқ депутатлари Янгиқўрғон тумани Кенгаши депутати Нажмиддинов Асадулла Икромович иштирокида 38-сонли умумтаълим мактабида Наманган тажрибаси асосида танлаб олинган «Боғ» маҳалласи «еттилиги» ва маҳалла фаоллари томонидан амалга оширилаётган профилактик ишлар тақдимоти билан танишилди.
Тақдимотда «Маҳалла устози» ҳамда «Намунали маҳалла» лойиҳалари доирасида ёшларнинг қизиқиши, қобилияти ва эҳтиёжларини ўрганиш, уларни таълим, касб-ҳунар, спорт ва маданият йўналишларига жалб этиш, муаммоли ёшлар билан индивидуал ишлаш борасида тўпланган тажрибалар ҳақида маълумот берилди.
Шунингдек, ёшларнинг бўш вақтини мазмунли ташкил этиш, уларни ёт ғоялар ва турли ҳуқуқбузарликлар таъсиридан ҳимоя қилиш, оила–мактаб–маҳалла ҳамкорлигини янада мустаҳкамлаш масалаларига алоҳида эътибор қаратилди.
Мулоқот якунида масъулларга ҳар бир ёш билан унинг қизиқиши ва эҳтиёжидан келиб чиққан ҳолда манзилли ишлаш, профилактик тадбирларни таъсирчан ва натижадор ташкил этиш ҳамда «Намунали маҳалла» тажрибасини бошқа ҳудудларда ҳам кенг татбиқ этиш бўйича тегишли вазифалар белгилаб берилди.