Xalq deputatlari tuman Kengashining 2026-yilga mo‘ljallangan ish rejasiga muvofiq O‘zbekiston Xalq demokratik partiyasidan saylangan deputat S.Madjitov tomonidan tumanda xotin-qizlarni har taraflama qo‘llab quvvatlash bo‘yicha amalga oshirilayotgan ishlar o‘rganildi.

🔻O‘rganish jarayonida, tuman Oila va xotin-qizlar bo‘limi bosh mutaxassisi D.Xashimova bilan suhbatlashilib, “Ayollar daftari”ga kiritilgan 4400 nafar xotin-qizlar bilan olib borilayotgan manzilli ishlar holatiga e’tibor qaratildi. Ularning mavjud muammolarini aniqlash, ehtiyojlaridan kelib chiqqan holda tegishli ijtimoiy yordam va amaliy ko‘mak ko‘rsatish, bandligini ta’minlash hamda turmush sharoitlarini yaxshilash bo‘yicha ishlar tahlil qilindi.

🔻“Ayollar daftari”ning 3-toifasiga kiritilgan 71 nafar ehtiyojmand xotin-qizlar alohida nazoratga olingani ma’lum bo‘ldi. Mazkur xotin-qizlar bo‘yicha ro‘yxatga kiritilgan bo‘lib, ularning ijtimoiy holatini yaxshilash, mavjud muammolarini bartaraf etish va zarur yordamlarni ko‘rsatish bo‘yicha tegishli ishlar amalga oshirilmoqda.

🔻Xususan, ushbu toifadagi xotin-qizlardan 8 nafari turar joy ijara to‘lovlarini qoplash uchun kompensatsiya oluvchilar ro‘yxatiga kiritilgan. Ularga belgilangan tartibda kompensatsiya to‘lovlari to‘lab berilgan. Shuningdek, uy-joyini ta’mirlashga muhtoj bo‘lgan 63 nafar xotin-qizlar bo‘yicha belgilangan ishlar amalga oshirilayotganligi ma’lum qilindi.

🔻Deputat tomonidan xotin-qizlarni qo‘llab-quvvatlashda manzillilik va natijadorlikka alohida e’tibor qaratish, “Ayollar daftari”ga kiritilgan har bir xotin-qizning muammosini alohida o‘rganish va belgilangan yordamlarning o‘z vaqtida yetkazib berilishini ta’minlash yuzasidan tegishli tavsiyalar berildi.