Prezident Shavkat Mirziyoevtiń Qaraqalpaqstanǵa saparı aymaqta ekonomikanı rawajlandırıw hám isbilermenlikti qollap-quwatlawǵa qaratılǵan jańa imkaniyatlar ashtı. Sapar dawamında investiciyalardı tartıw, jańa jumıs orınların jaratıw hám kishi biznesti rawajlandırıwǵa ayrıqsha itibar qaratıldı.
Prezidentimiz Shavkat Mirziyoevtiń Qaraqalpaqstan Respublikasına saparı aymaqtıń sociallıq-ekonomikalıq rawajlanıwın jańa basqıshqa kóteriw, isbilermenlikti qollap-quwatlaw hám xalıqtıń abadanlıǵın arttırıwǵa qaratılǵan áhmiyetli wazıypalardı belgilep berdi.
Sapar dawamında Qaraqalpaqstanda ámelge asırılıp atırǵan jumıslar tallanıp, aymaqtıń bar imkaniyatlarınan nátiyjeli paydalanıw, investiciyalardı tartıw, jańa kárxanalar shólkemlestiriw hám jumıs orınların kóbeytiw máselelerine ayrıqsha itibar qaratıldı.
Búgin isbilermenlikti rawajlandırıw ushın jaratılıp atırǵan sharayatlar isbilermenlerdi jańa joybarlarǵa iytermelemekte. Sapar etiw sheńberinde iri investiciyalıq joybarlarǵa start berilgeni, isbilermenlerdi qarjılay qollap-quwatlaw ilajları belgilengeni aymaq ekonomikası ushın úlken áhmiyetke iye.
Ásirese, kishi biznes hám shańaraqlıq isbilermenlikti rawajlandırıw, jeńilletilgen kreditlerden paydalanıw imkaniyatların keńeytiw, jańa jumıs orınların jaratıwǵa qaratılǵan wazıypalar xalıqtıń dáramatların arttırıwǵa xızmet etedi.
Bul imkaniyatlar Bozataw rayonı isbilermenleri ushın da áhmiyetli. Rayonımızda sanaat, awıl xojalıǵı ónimlerin qayta islew, xızmet kórsetiw, sawda hám basqa da baǵdarlarda jańa joybarlardı ámelge asırıw ushın potencial jeterli.
Deputat sıpatında isbilermenler menen turaqlı pikirlesiw, olardıń usınıs hám mashqalaların úyreniw, nızamlı máplerin qollap-quwatlawdı áhmiyetli wazıypa dep bilemen.
Sebebi, isbilermenlik rawajlansa, jańa jumıs orınları jaratıladı, xalıqtıń dáramatları artadı. Prezidentimizdiń sapar etiwi dawamında belgilengen wazıypalardı orınlarda nátiyjeli ámelge asırıw Qaraqalpaqstan, sonıń ishinde, Bozataw rayonınıń rawajlanıwına múnásip úles qosadı.
Eń áhmiyetlisi, jaratılǵan imkaniyatlardı anıq nátiyjege aylandırıw, hár bir baslamanı qollap-quwatlaw hám xalıqtıń abadanlıǵına xızmet etiw bolıp tabıladı.

Xalıq deputatları Bozataw rayonlıq Keńesi 5-sanlı “Qusqanataw” saylaw okruginen saylanǵan deputat Nurmanov Kılıshbay Turımbetovich