Xalq deputatlari Muzrabot tumani Kengashining korrupsiyaga qarshi kurashish, davlat organlarida ochiqlikni ta’minlash va huquqiy masalalar bo‘yicha doimiy komissiyasi raisi Tangirov Tursunqul, ijtimoiy soha, yoshlar siyosati, madaniyat va sport masalalari bo‘yicha doimiy komissiya a’zosi Kenjayeva Mazluma, tuman Kengashi kotibiyati mudiri Sherboyev Dilmurod hamda bosh mutaxassisi Xoliqov Bahodir hamkorligida O‘zbekiston Respublikasining 2014-yil 2-yanvardagi O‘RQ–364-sonli “Vasiylik va homiylik to‘g‘risida”gi Qonuni ijrosi yuzasidan o‘rganish ishlari amalga oshirildi.

O‘rganish davomida Muzrabot tumani “Inson” ijtimoiy xizmatlar markazining Bolalarni ijtimoiy himoya qilish sho‘basi faoliyati bilan tanishilib, mas’ul xodimlar ishtirokida qonun ijrosi, amalga oshirilayotgan ishlar va mavjud muammolar muhokama qilindi.

Ma’lum qilinishicha, tumanda 57 106 nafar voyaga yetmaganlar istiqomat qiladi.

O‘rganish jarayonida ayrim mahallalarda, xususan Tong yulduzi va Dehqonobod mahallalarida vasiylik va homiylikka muhtoj bolalar hamda nomzodlar yuzasidan ma’lumotlar taqdim etilmayotgani tanqidiy tahlil qilinib, bu holat bolalar manfaatlarini himoya qilishga salbiy ta’sir ko‘rsatishi qayd etildi.

Shuningdek, tumandagi 4 ta umumta’lim maktabida inklyuziv ta’lim yo‘lga qo‘yilgan bo‘lib, ularda jami 8 nafar nogironligi bo‘lgan bola ta’lim olmoqda. Bundan tashqari, Shaffof mahallasidagi 1-sonli maktabgacha ta’lim tashkilotida ham inklyuziv ta’lim tashkil etilgan.

Mas’ullar tomonidan ota-onasi chet elga ketgan yoki ota-ona qaramog‘idan mahrum bo‘lgan bolalarni o‘z vaqtida aniqlash, ularni oilaviy muhitga joylashtirish hamda qonun bilan kafolatlangan huquq va manfaatlarini ta’minlash bo‘yicha targ‘ibot ishlari muntazam olib borilayotgani ta’kidlandi.

O‘rganish yakunida “Vasiylik va homiylik to‘g‘risida”gi Qonun mazmun-mohiyatini aholi, ayniqsa mahallalar, ta’lim muassasalari va yoshlar o‘rtasida keng targ‘ib qilish, deputatlik nazoratini yanada kuchaytirish hamda aniqlangan kamchiliklarni bartaraf etish yuzasidan tegishli tavsiyalar berildi.