Бугунги кунда аҳолига сифатли
ва замонавий тиббий хизмат кўрсатишни таъминлаш давлат сиёсатидаги муҳим
йўналишлардан бири ҳисобланади. Айниқса, тиббий муассасаларни замонавий тиббий
асбоб-ускуналар билан жиҳозлаш, диагностика ва даволаш сифатини ошириш борасида
кенг кўламли ишлар амалга оширилмоқда. 

Замонавий тиббий технологиялар
билан жиҳозланган шифохона ва поликлиникалар аҳолига ўз вақтида, аниқ ва
сифатли тиббий хизмат кўрсатиш имконини яратади. Янги тиббий асбоб-ускуналар
касалликларни эрта аниқлаш, тўғри ташхис қўйиш ҳамда самарали даволаш
чораларини белгилашда муҳим аҳамият касб этмоқда. 

Тиббий муассасаларда замонавий
диагностика аппаратлари, лаборатория жиҳозлари ва бошқа юқори технологик тиббий
ускуналардан самарали фойдаланиш йўлга қўйилмоқда. Бу эса фуқароларнинг узоқ
масофаларга бориб тиббий текширувдан ўтиш эҳтиёжини камайтириш, тиббий
хизматларни аҳолига янада яқинлаштиришга хизмат қилмоқда. 

Бу борада сўнгги йилларда туманимиз тиббиёт бирлашмасига
қарашли 3 та оилавий поликлиника, 3 та оилавий шифокор пункти, кўп тармоқли
туман поликлиникаси ва марказлашган шифохона бўлимлари рақамлаштириш бўйича
зарур компьютер жиҳозлари билан таъминланди. Интернет тармоқлари тортилиб,
бир-бири билан маълумотлар алмашиш йўлга қўйилди. 

туманимиз тиббиёт бирлашмасига сўнгги йилларда 140 та
компьютер, 25 та планшет, 23 та принтер, 354 дона 2D сканер, 4 та инфокиоск, 11
дона Smart ТВ, 9 та веб-камера, 26 дона чек-принтер, 16 та этикетка принтери, 1
дона автомат сканер билан таминланди. 

Бу борада амалга оширилаётган ишлар, энг аввало, халқимизга
муносиб тиббий хизмат кўрсатиш, инсон қадри ва саломатлигини таъминлашга
қаратилган эзгу мақсадларга хизмат қилади. Зеро, соғлом халқ — мамлакат
тараққиёти ва келажагининг мустаҳкам пойдеворидир. 

С.Бахретдинова
Халқ депутатлари Мўйноқ туман Кенгаши депутати