Янгиқўрғон тумани маркази ва Обод маҳалласини боғловчи йўлда пиёдалар учун қулай ва хавфсиз йўлак барпо этилмоқда

Янгиқўрғон тумани марказини Обод маҳалласи билан боғловчи йўлда аҳоли учун қулай ва хавфсиз ҳаракатланиш шароитларини яратиш мақсадида инфратузилма ишлари амалга оширилмоқда.

Лойиҳа доирасида 2,7 километр пиёдалар йўлакчаси барпо этиш ҳамда 75 та қуёш панеллари асосида ишловчи замонавий кўча чироқларини ўрнатиш белгиланган.

Мазкур ишлар учун республика бюджетидан 2 миллиард 100 миллион сўм маблағ ажратилган бўлиб, ҳозирга қадар 1 миллиард 84,3 миллион сўмлик ишлар бажарилиб, лойиҳа ижроси 51,6 фоизни ташкил этмоқда. Бугунги кунга қадар режалаштирилган пиёдалар йўлагининг 2,5 километри қуриб битказилди.

Айни пайтда ҳудудга ўриндиқлар ва қуёш панелли кўча чироқларини олиб келиш ҳамда ўрнатиш бўйича ишлар давом этмоқда. Қурилиш ишлари “BARAKOT-HIMMAT FAYZ” хусусий корхонаси томонидан амалга оширилмоқда.

Мазкур ишлар Халқ депутатлари Наманган вилояти Кенгаши депутатлари Н. Мухамадиева, Д. Хатамова, Кенгаш котибияти мудири Т. Гаппаров ҳамда Янгиқўрғон тумани Кенгаши котибияти мудири М. Эргашева иштирокида ўрганилди.

Ўрганиш жараёнида қурилиш ишларининг сифати, ажратилган маблағларнинг мақсадли сарфланиши ҳамда лойиҳани белгиланган муддатда тўлиқ якунлаш масалаларига алоҳида эътибор қаратилди.

Лойиҳа тўлиқ амалга оширилгач, туман маркази ва Обод маҳалласи ўртасида пиёдаларнинг хавфсиз ҳаракатланиши таъминланиб, йўл бўйи инфратузилмаси ҳамда ҳудуднинг тунги ёритиш тизими янада яхшиланади.