Mahallalarda kambag‘allikni qisqartirish, tadbirkorlikni rivojlantirish hamda aholi bandligini ta’minlash borasida berilgan topshiriqlar ijrosini nazorat qilish — shahar Kengashi deputatlarining doimiy diqqat-markazida!

O‘zbekiston Respublikasi Prezidentining 2026-yil 24-iyundagi “Mahalla boshqaruvini samarali tashkil etishga oid qo‘shimcha chora-tadbirlar to‘g‘risida”gi PF-116-sonli Farmoni ijrosi yuzasidan Xalq deputatlari Termiz shahar Kengashining navbatdagi sessiyasi kun tartibiga kiritilgan masala doirasida tizimli nazorat-tahlil tadbirlari olib borilmoqda.

Xususan, Kengash kotibiyati mudiri, deputat A.Ashurov hamda kotibiyat bosh mutaxassisi A.Temirovlar 25-“Kokildorota” saylov okrugi deputati M.Sidiqova biriktirilgan “Kokildorota” mahallasida bo‘lib, hokim yordamchisining faoliyatini atroflicha o‘rgandilar.

Mas’ullar tomonidan Hokim yordamchisiga PF-116-sonli Farmon bilan yuklatilgan asosiy vazifalarning amaldagi ijrosi va erishilgan natijalar tahlil qilindi:

Imtiyozli kreditlar: Bugungi kunga qadar oilaviy va kichik tadbirkorlikni rivojlantirish uchun 18 ta fuqaroga 50 million so‘mdan imtiyozli kredit mablag‘lari yo‘naltirildi;

Mikroloyihatlar: Joriy yilning avgust oyida mahalla hududida aholi daromadini oshirishga qaratilgan 2 ta yangi mikroloyiha ishga tushirildi;

Aholi bandligi: Avgust oyining o‘zida 12 nafar ishsiz fuqaroning bandligi ta’minlandi.

O‘rganish yakunida Hokim yordamchisi va mahalla mas’ullariga imtiyozli kreditlardan foydalanish samaradorligini doimiy monitoring qilib borish, yangi mikroloyihalar sonini ko‘paytirish hamda ehtiyojmand xonadonlarni daromadli mehnatga jalb etish bo‘yicha tegishli deputatlik tavsiya va ko‘rsatmalari berildi.